siskiyaan bhar ke 'sharar' kaun vahaan rotaa thaa — Kaleem Haider Sharar

ab is ko zindagi kahiye ki ahd-e-be-hisi kahiye
gharon mein log rote hain magar raston pe hanste hain

— Kaleem Haider Sharar

kai logon ne phalte phulte peDon se jaanaa hai
magar main ne tujhe sabze ki uryaani se pahchaanaa

— Kaleem Haider Sharar

apne darvaaze pe baiThaa sochtaa rahtaa huun main
meraa ghar ajdaad ki baara-dari kaa karb hai

— Kaleem Haider Sharar

yahaan pe dasht o samundar ki baat mat karnaa
hamaare shahr kaa har shakhs hai makaan-zada

— Kaleem Haider Sharar

haqiqat hai ise maanein na maanein ghaTti baDhti hain
vo jhuTi hon ki sachchi daastaanein ghaTti baDhti hain

— Kaleem Haider Sharar

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

— Parveen Shakir

ghulaami mein na kaam aati hain shamshirein na tadbirein
jo ho zauq-e-yaqin paidaa to kaT jaati hain zanjirein

— Allama Iqbal

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

maarka garm to ho lene do khun-rezi kaa
pahle shamshir ke niche hamin jaa baiTheinge

— Mir Taqi Mir

nahin vo sham-e-mohabbat rahi to phir 'aasim'
ye kis duaa se mire ghar mein raushni si hai

— Asim Wasti

shahr ke aabaad sannaaTon ki vahshat dekh kar
dil ko jaane kyaa huaa main shaam se ghar aa gayaa

— Sajjad Baqar Rizvi