muntazir huun tiri aavaaz se tasvir talak — Kamran Nafees

dikhaai bhi nahin degi badan gharqaab kar ke
miyaan-e-vasl ik chaalaak khaak uDti rahegi

— Kamran Nafees

kal dopahar ko saath rahaa thaa vo der tak
phir us ke baa'd shaam rahi shaam hi rahi

— Kamran Nafees

hamaare chaak-e-garebaan kaa taar thaa ye kabhi
ye jis pharere ko nikle hain aap lahraane

— Kamran Nafees

ek hi dar thaa gali mein vo bhi darvaaza huaa
jab se har aavaaz par be-kaar mein khulne lagaa

— Kamran Nafees

vo ik aavaaz thi manzil nahin thi
magar main us ki jaanib chal paDaa thaa

— Kamran Nafees

dil dhaDakne kaa sabab zindagi ho sakti hai
ye zaruri to nahin hai ki tiri yaad hi ho

— Kamran Nafees

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

— Parveen Shakir

pyaaso raho na dasht mein baarish ke muntazir
maaro zamin pe paanv ki paani nikal paDe

— Iqbal Sajid

phir baiThe baiThe vaada-e-vasl us ne kar liyaa
phir uTh khaDaa huaa vahi rog intizaar kaa

— Ameer Minai

vahaan hamaaraa koi muntazir nahin phir bhi
hamein na rok ki ghar jaanaa chaahte hain ham

— Wali Aasi

kisi ke raste pe kaise nazrein jamaae rakkhun
abhi to karnaa mujhe hai khud intizaar meraa

— Alam Khursheed

barseingi aaj rahmatein aamad hai yaar ki
naayaab hain ye ghaDiyaan tire intizaar ki

— Ameeta Parsuram Meeta