kise khayaal thaa miTti hui ibaarat kaa — Khaleel Tanveer

zamaana laakh sitaaron ko chhu ke aa jaae
abhi dilon ko magar haajat-e-rafu hai vahi

— Khaleel Tanveer

vo log apne aap mein kitne aziim the
jo apne dushmanon se bhi nafrat na kar sake

— Khaleel Tanveer

auron ki buraai ko na dekhun vo nazar de
haan apni buraai ko parakhne kaa hunar de

— Khaleel Tanveer

rusvaa hue zalil hue dar-ba-dar hue
haq baat lab pe aai to ham be-hunar hue

— Khaleel Tanveer

parind shaakh pe tanhaa udaas baiThaa hai
uDaan bhuul gayaa muddaton ki bandish mein

— Khaleel Tanveer

parind unchi uDaanon ki dhun mein rahtaa hai
magar zamin ki hadon mein basar bhi kartaa hai

— Khaleel Tanveer

ret par ik nishaan hai shaayad
ye hamaaraa makaan hai shaayad

— Muzaffar Abdali

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

— Parveen Shakir

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

— Irfan Sattar

ghulaami mein na kaam aati hain shamshirein na tadbirein
jo ho zauq-e-yaqin paidaa to kaT jaati hain zanjirein

— Allama Iqbal