kis ki khaatir ujaaD raste par — Khurshid Rabbani

dekh kar bhi na dekhnaa us kaa
ye adaa to buton mein hoti hai

— Khurshid Rabbani

kisi ne meri taraf dekhnaa na thaa 'khurshid'
to be-sabab hi sanvaaraa gayaa thaa kyuun mujh ko

— Khurshid Rabbani

koi nahin jo miTaae miri siyah-bakhti
falak pe kitne sitaare hain jagmagaae hue

— Khurshid Rabbani

tiraa bakhshaa huaa ik zakhm pyaare
chali ThanDi havaa jalne lagaa hai

— Khurshid Rabbani

havaa-e-taaza kaa jhonkaa idhar se kyaa guzraa
gire paDe hue patton mein jaan aa gai hai

— Khurshid Rabbani

khvaabon ki main ne ek imaarat banaai aur
yaadon kaa us mein ek daricha banaa liyaa

— Khurshid Rabbani

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

sabza o gul kahaan se aae hain
abr kyaa chiiz hai havaa kyaa hai

— Mirza Ghalib

qaatil tiri gali bhi badaun se kam nahin
jis ke qadam qadam pe mazaar-e-shahid hai

— Mushafi Ghulam Hamdani

kuchh phulon ki khaatir bhi kuchh phulon kaa
sab se achchhaa rang churaanaa paDtaa hai

— Nadeem Bhabha

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

— Irfan Sattar

gulaabon ke honTon pe lab rakh rahaa huun
use der tak sochnaa chaahtaa huun

— Zubair Rizvi