tumhaare ishq-e-abru mein hilaal-e-id ki surat — Kishan Kumaar Waqaar

aatishin husn kyuun dikhaate ho
dil hai aashiq kaa koh-e-tur nahin

— Kishan Kumaar Waqaar

ukhDi baaton se us ki saabit hai
kuchh na kuchh aaj ghair jaD ke uThaa

— Kishan Kumaar Waqaar

ashk-e-hasrat hai aaj tufaan-khez
kashti-e-chashm ki tabaahi hai

— Kishan Kumaar Waqaar

chhuptaa nahin hai dil mein kabhi raaz ishq kaa
ye aag vo hai jis ko nahin taab sang mein

— Kishan Kumaar Waqaar

bahut dinon se huun aamad kaa apni chashm-ba-raah
tumhaaraa le gayaa ai yaar intizaar kahaan

— Kishan Kumaar Waqaar

haath pistaan pe ghair kaa pahunchaa
aap bhi ab hue anaar-farosh

— Kishan Kumaar Waqaar

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

— Ibn

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

— Haidar Ali Aatish

sabhi se jab mohabbat chaahte ho
mohabbat kyon nahin karte sabhi se

— Saleem Amrohvi

dil-e-haris hi apnaa na ho sakaa qaane
vagarna tere karam mein to kuchh kami na rahi

— Soz Hoshiarpuri

sach ishq mein hain aashiq o maashuq baraabar
jo mushkil-e-majnun hai so hai mushkil-e-lailaa

— Mushafi Ghulam Hamdani