baarish jise 'mahmud' samajhtaa hai zamaana — Mahmood Ahmad Hashmi

zulm bhi sharmaa rahaa hai adl ki mizaan se
kuud jaanaa chaahiye minaar-e-paakistaan se

— Mahmood Ahmad Hashmi

aisaa kahaan ye zaaiqa gandum ke paas hai
roTi mein maan ke haath ki shaamil miThaas hai

— Mahmood Ahmad Hashmi

miri vafaa mein kami hai to mujh se baat kare
use kaho ki vo aae muzaakaraat kare

— Mahmood Ahmad Hashmi

raae kyaa qaaem kareinge ajnabi us shahr mein
rasta batlaae jahaan par ek andhaa aadmi

— Mahmood Ahmad Hashmi

pahle soyaa kartaa thaa 'mahmud' lambi taan kar
phir shuur aataa gayaa aur ratjage baDhte gae

— Mahmood Ahmad Hashmi

miri tarah se shajar bhi hain baaghiyaana mizaaj
jahaan se kaaTe gae the vahin se ug aae

— Mahmood Ahmad Hashmi

pyaaso raho na dasht mein baarish ke muntazir
maaro zamin pe paanv ki paani nikal paDe

— Iqbal Sajid

sach ishq mein hain aashiq o maashuq baraabar
jo mushkil-e-majnun hai so hai mushkil-e-lailaa

— Mushafi Ghulam Hamdani

chaand ne taan li hai chaadar-e-abr
ab vo kapDe badal rahi hogi

— Jaun Elia

sabza o gul kahaan se aae hain
abr kyaa chiiz hai havaa kyaa hai

— Mirza Ghalib

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai

— Zafar Iqbal

us ko sochun to dhyaan mein mere
khushbu aati hai pahli baarish ki

— Vibha Jain 'Khwaab'