ik baar mein hi tu miraa qissa tamaam kar — Manzar Suhai

ishq pe ijtihaad kar kar ke
mujtahid ho gayaa huun main gham kaa

— Manzar Suhai

mohabbat ki bhi to ik bevafaa se
ye qatl-e-khud nahin to aur kyaa hai

— Manzar Suhai

hai isi baat kaa malaal mujhe
ki mujhe ab koi malaal nahin

— Manzar Suhai

hone do agar ho gae kuchh log bure bhi
gulshan mein agar phuul hain to khaar bhi honge

— Manzar Suhai

laDkaa na koi phir se ho barbaad dahr mein
tujh par na jaaein beTiyaan teri khudaa kare

— Manzar Suhai

raahon ke pattharon kaa bhalaa kyaa gila karun
ab aadmi ke dil bhi to patthar ke ho gae

— Manzar Suhai

ret par ik nishaan hai shaayad
ye hamaaraa makaan hai shaayad

— Muzaffar Abdali

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

pyaaso raho na dasht mein baarish ke muntazir
maaro zamin pe paanv ki paani nikal paDe

— Iqbal Sajid

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

— Aabid Adeeb

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

— Irfan Sattar