kyaa kahein kuchh kahaa nahin jaataa — Mir Taqi Mir

jab ki pahlu se yaar uThtaa hai
dard be-ikhtiyaar uThtaa hai

— Mir Taqi Mir

maarka garm to ho lene do khun-rezi kaa
pahle shamshir ke niche hamin jaa baiTheinge

— Mir Taqi Mir

ijz-o-niyaaz apnaa apni taraf hai saaraa
is musht-e-khaak ko ham masjud jaante hain

— Mir Taqi Mir

dikhaai diye yuun ki be-khud kiyaa
hamein aap se bhi judaa kar chale

— Mir Taqi Mir

'mir'-saahib zamaana naazuk hai
donon haathon se thaamiye dastaar

— Mir Taqi Mir

mire saliqe se meri nibhi mohabbat mein
tamaam umr main naakaamiyon se kaam liyaa

— Mir Taqi Mir

main baDaa ho gayaa huun magar bachpanaa
mere dil se kabhi bhi gayaa hi nahin

— Divyansh Rawat

raat yuun dil mein tiri khoi hui yaad aai
jaise viraane mein chupke se bahaar aa jaae

— Faiz Ahmad Faiz

baat chal niklegi phir iqraar ki inkaar ki
phir vahi bachpan ke bhule giit gaae jaaeinge

— Aazim Kohli

kisi parind ki chikhon ne sang-baari ki
sukut-e-shaam kaa shisha bikhar gayaa mujh mein

— Akash Arsh

kal ye mumkin hai ki lahraaein khushi ke giit bhi
har nazar mein aaj ik khaamosh saa aalam sahi

— Azmat Abdul Qayyum Khan

sabab khaamoshiyon kaa main nahin thaa
mire ghar mein sabhi kam bolte the

— Bharat Bhushan Pant