ye kis maqaam pe tanhaai saunpte ho mujhe — Nasir Zaidi

main be-hunar thaa magar sohbat-e-hunar mein rahaa
shuur bakhshaa hama-rang mahfilon ne mujhe

— Nasir Zaidi

haan ye khataa hui thi ki ham uTh ke chal diye
tum ne bhi to palaT ke pukaaraa nahin hamein

— Nasir Zaidi

dekhaa use to aankh se aansu nikal paDe
dariyaa agarche khushk thaa paani tahon mein thaa

— Nasir Zaidi

vo yuun milaa hai ki jaise kabhi milaa hi na thaa
hamaari zaat pe jis ki inaayatein thiin bahut

— Nasir Zaidi

raat sunsaan hai gali khaamosh
phir rahaa hai ik ajnabi khaamosh

— Nasir Zaidi

vo bhi kyaa din the ki jab ishq kiyaa karte the
ham jise chaahte the chuum liyaa karte the

— Nasir Zaidi

ye aansu ponchh lijiye aur muskuraaiye
chaara nahin hai koi bhi rukhsat kiye baghair

— Nasim Zahid

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

jab ki pahlu se yaar uThtaa hai
dard be-ikhtiyaar uThtaa hai

— Mir Taqi Mir

main ne apni palkon par gham-kade sajaae hain
aarzu ke maatam mein sogvaar hasti hai

— Hanif Fauq

husn jalva dikhaa gayaa apnaa
ishq baiThaa rahaa udaas kahin

— Saifuddin Saif

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

— Nazeer Akbar Abadi