sab jahaangir niyaamon se nikal aaeinge — Nomaan Shauque

rok do ye raushni ki tez dhaar
meri miTTi mein gundhi hai raat bhi

— Nomaan Shauque

vo saanp jis ne mujhe aaj tak Dasaa bhi nahin
tamaam zahr sukhan mein mire usi kaa hai

— Nomaan Shauque

phir is mazaaq ko jamhuriyat kaa naam diyaa
hamein Daraane lage vo hamaari taaqat se

— Nomaan Shauque

apni aahaT pe chaunktaa huun main
kis ki duniyaa mein aa gayaa huun main

— Nomaan Shauque

vo tanz ko bhi husn-e-talab jaan khush hue
ulTaa paDhaa gayaa, miraa paighaam aur thaa

— Nomaan Shauque

is baar intizaam to sardi kaa ho gayaa
kyaa haal peD kaTte hi basti kaa ho gayaa

— Nomaan Shauque

leaderi chaaho to lafz-e-qaum hai mehmaan-navaaz
gap-navison ko aur ahl-e-mez ko raazi karo

— Akbar Allahabadi

donon ke dil mein khauf thaa maidaan-e-jang mein
donon kaa khauf faasla thaa darmiyaan kaa

— Mohammad Alvi

yaan ziist kaa khatra nahin haan khinchiye talvaar
vo ghair thaa jo dekh ke samsaam Dare thaa

— Jurat Qalandar Bakhsh

ek muddat se miri maan nahin soi 'taabish'
main ne ik baar kahaa thaa mujhe Dar lagtaa hai

— Abbas Tabish

laDkhaDaa kar gir paDi unchi imaarat dafatan
dafatan taamir ki kursi pe khanDar jam gayaa

— Ehteram Islam

milaa hai takht jo jamhuriyat mein bandar ko
to un se kyaa sabhi jangal ke sher Dar jaaein

— Ehya Bhojpuri