tark-e-vafaa ke baa'd ye us ki adaa 'qatil' — Qateel Shifai

maanaa jivan mein aurat ik baar mohabbat karti hai
lekin mujh ko ye to bataa de kyaa tu aurat zaat nahin

— Qateel Shifai

mere baa'd vafaa kaa dhokaa aur kisi se mat karnaa
gaali degi duniyaa tujh ko sar meraa jhuk jaaegaa

— Qateel Shifai

ab jis ke ji mein aae vahi paae raushni
ham ne to dil jalaa ke sar-e-aam rakh diyaa

— Qateel Shifai

yuun barasti hain tasavvur mein puraani yaadein
jaise barsaat ki rim-jhim mein samaan hotaa hai

— Qateel Shifai

zindagi main bhi chalungaa tire pichhe pichhe
tu mire dost kaa naqsh-e-kaf-e-paa ho jaanaa

— Qateel Shifai

sitam to ye hai ki vo bhi na ban sakaa apnaa
qubul ham ne kiye jis ke gham khushi ki tarah

— Qateel Shifai

taazgi hai sukhan-e-kuhna mein ye baad-e-vafaat
log aksar mire jiine kaa gumaan rakhte hain

— Imam Bakhsh Nasikh

is qadar musalsal thiin shiddatein judaai ki
aaj pahli baar us se main ne bevafaai ki

— Ahmad Faraz

kuchh to majburiyaan rahi hongi
yuun koi bevafaa nahin hotaa

— Bashir Badr

apni kashti kaa hai khudaa haafiz
pichhe tufaan hai saamne girdaab

— Meer Mehdi Majrooh

ye jafaaon ki sazaa hai ki tamaashaai hai tu
ye vafaaon ki sazaa hai ki pae-daar huun main

— Hamid Mukhtar Hamid

is zindagi ne saath kisi kaa nahin diyaa
kis bevafaa se tujh ko tamannaa vafaa ki hai

— Rasool Jahan Begam Makhfi Badayuni