aur baDh jaataa hai dil mein mire shauq-e-manzil — Raghib Dehlvi

baiThegaa to ruk jaaegi ye gardish-e-dauraan
tu khuun ki tarah jism mein phirne ki adaa siikh

— Raghib Dehlvi

khayaal-o-vahm hai manzil yahaan mili hai kise
chalaa hai jo bhi usi rahguzar mein rahtaa hai

— Raghib Dehlvi

shauq-e-manzil mujhe yuun le ke uDaa
khaar dekhe na rahguzar dekhi

— Raghib Dehlvi

qatron se samundar kaa banaanaa nahin mushkil
qatre mein samundar ko samone ki adaa siikh

— Raghib Dehlvi

ye sab maah-o-anjum mire vaaste hain
magar is zamin par main qaid-e-jahaan huun

— Raghib Dehlvi

ab dil mein aarzu-e-chaman hi nahin rahi
qisse sune jo ham ne qafas mein bahaar ke

— Raghib Dehlvi

main baDaa ho gayaa huun magar bachpanaa
mere dil se kabhi bhi gayaa hi nahin

— Divyansh Rawat

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

— Shakeel Badayuni

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

— Nida Fazli

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai

— Zafar Iqbal

us ke munh pe mukar gayaa thaa dil
aaj had se guzar gayaa thaa dil

— Divyansh Rawat