ajiib baat hai us raat ki sahar na hui — Rakesh Toofan

lauTaa jab chaand bhi suraj bhi khasaaraa kar ke
ham ne chamkaa diyaa aangan ko sitaaraa kar ke

— Rakesh Toofan

jahaan pe jhuuT hai nafrat hai be-imaani hai
vahin pe zindagi-bhar zindagi bitaani hai

— Rakesh Toofan

rasm-e-duniyaa ke bayaabaan mein bichhaDne vaale
ishq-e-aavaara tujhe DhunDh rahaa hai ab tak

— Rakesh Toofan

zakhm chup-chaap rahegaa to rafu bolegaa
tum mujhe qatl bhi kar do to lahu bolegaa

— Rakesh Toofan

main shajar dekh ke Dar jaataa huun
is qadar dhuup ki aadat hai mujhe

— Rakesh Toofan

jhaankte raat ke garebaan se
ham ne sau aaftaab dekhe hain

— Salman Akhtar

raushni ho rahi hai kuchh mahsus
kyaa shab aakhir tamaam ko pahunchi

— Aslam Farrukhi

shor din ko nahin sone detaa
shab ko sannaaTaa jagaa detaa hai

— Saifuddin Saif

ye sar-ba-mohr botalein hain jo sharaab ki
raatein hain un mein band hamaari shabaab ki

— Riyaz Khairabadi

andheri shab kaa ye khvaab-manzar mujhe ujaalon se bhar rahaa hai
to raat itni tavil kar de ki taa-qayaamat sahar na aae

— Aleena Itrat

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

— Aziz Nabeel