saaqiyaa muhr-ba-lab kar ke sila kyaa paayaa — Sadiq Bajwa

umr guzri hai magar khud se judaa kar na sake
bhulne vaale tiri yaad mein kyaa rakkhaa hai

— Sadiq Bajwa

main baDaa ho gayaa huun magar bachpanaa
mere dil se kabhi bhi gayaa hi nahin

— Divyansh Rawat

raat yuun dil mein tiri khoi hui yaad aai
jaise viraane mein chupke se bahaar aa jaae

— Faiz Ahmad Faiz

ai kaash khud sukut bhi mujh se ho ham-kalaam
main khaamushi-zada huun sadaa chaahiye mujhe

— Sabir Zafar

khaamosh tum the aur mire honTh bhi the band
phir itni der kaun thaa jo boltaa rahaa

— Sheen Kaaf Nizam

zulm sahte rahe shukr karte rahe aai lab tak na ye daastaan aaj tak
mujh ko hairat rahi anjuman mein tiri kyuun hain khaamosh ahl-e-zabaan aaj tak

— Akhtar Ansari Akbarabadi

almaari mein tasvirein rakhtaa huun
ab bachpan aur buDhaapaa ek hue

— Akhtar Hoshiyarpuri