siine se hamaaraa dil na le jaao — Sakhi Lakhnvi

ham un se aaj kaa shikva kareinge
ukhaaDeinge vo barson ki gaDi baat

— Sakhi Lakhnvi

na aashiq hain zamaane mein na maashuq
idhar ham rah gae hain aur udhar aap

— Sakhi Lakhnvi

baat karne mein honT laDte hain
aise takraar kaa khudaa-haafiz

— Sakhi Lakhnvi

dard ko gurda taDapne ko jigar
hijr mein sab hain magar dil to nahin

— Sakhi Lakhnvi

dafn ham ho chuke to kahte hain
is gunahgaar kaa khudaa-haafiz

— Sakhi Lakhnvi

ek do tiin chaar paanch chhe saat
yunhi gin leinge kam ke kyaa maani

— Sakhi Lakhnvi

main baDaa ho gayaa huun magar bachpanaa
mere dil se kabhi bhi gayaa hi nahin

— Divyansh Rawat

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

— Shakeel Badayuni

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

main badalte hue haalaat mein Dhal jaataa huun
dekhne vaale adaakaar samajhte hain mujhe

— Shahid Zaki

dil-e-haris hi apnaa na ho sakaa qaane
vagarna tere karam mein to kuchh kami na rahi

— Soz Hoshiarpuri

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

— Nida Fazli