bas ek chikh si ubhregi khaana-e-dil se — Salim Saleem

main ghaTtaa jaa rahaa huun apne andar
tumhein itnaa ziyaada kar liyaa hai

— Salim Saleem

is dil mein chubhaa rahtaa thaa kaanTe ki tarah vo
ik roz use main ne mohabbat se nikaalaa

— Salim Saleem

kitne bekaar khudaaon ki ibaadat ki hai
aakhiri baar kisi but se shikaayat ki hai

— Salim Saleem

aa rahaa hogaa vo daaman se havaa baandhe hue
aaj khushbu ko pareshaan kiyaa jaaegaa

— Salim Saleem

charaagh-e-ishq badan se lagaa thaa kuchh aisaa
main bujh ke rah gayaa us ko havaa banaane mein

— Salim Saleem

sunaa hai chaand ko uljhaa liyaa hai shaakhon ne
so ab charaagh darichon pe rakh diye jaaein

— Salim Saleem

main baDaa ho gayaa huun magar bachpanaa
mere dil se kabhi bhi gayaa hi nahin

— Divyansh Rawat

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

— Shakeel Badayuni

main badalte hue haalaat mein Dhal jaataa huun
dekhne vaale adaakaar samajhte hain mujhe

— Shahid Zaki

chaand ne taan li hai chaadar-e-abr
ab vo kapDe badal rahi hogi

— Jaun Elia

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai

— Zafar Iqbal