ishq adab hai to apne aap aae — Sarfraz Nawaz

tumhaare sach ki hifaazat mein yuun huaa akasr
ki apne-aap ko jhuTaa banaa liyaa main ne

— Sarfraz Nawaz

be-sadaa si kisi aavaaz ke pichhe pichhe
chalte chalte main bahut duur nikal jaataa huun

— Sarfraz Nawaz

khudaa kare ki vahi baat us ke dil mein ho
jo baat kahne ki himmat juTaa rahaa huun main

— Sarfraz Nawaz

safar kahaan se kahaan tak pahunch gayaa meraa
ruke jo paanv to kaandhon pe jaa rahaa huun main

— Sarfraz Nawaz

mire baghair koi tum ko DhunDtaa kaise
tumhein pata hai tumhaaraa pata rahaa huun main

— Sarfraz Nawaz

vo koi aam saa hi jumla thaa
tere munh se buraa lagaa mujh ko

— Sarfraz Nawaz

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

— Ibn

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

sabhi se jab mohabbat chaahte ho
mohabbat kyon nahin karte sabhi se

— Saleem Amrohvi

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

— Haidar Ali Aatish

dil-e-haris hi apnaa na ho sakaa qaane
vagarna tere karam mein to kuchh kami na rahi

— Soz Hoshiarpuri

sach ishq mein hain aashiq o maashuq baraabar
jo mushkil-e-majnun hai so hai mushkil-e-lailaa

— Mushafi Ghulam Hamdani