main chaahtaa huun use aur chaahne ke sivaa — Saud Usmani

jaan hai to jahaan hai dil hai to aarzu bhi hai
ishq bhi ho rahegaa phir jaan abhi bachaaiye

har ik ufuq pe musalsal tulua hotaa huaa
main aaftaab ke maanind rahguzaar mein thaa

bahut dinon mein mire ghar ki khaamushi TuuTi
khud apne-aap se ik din kalaam main ne kiyaa

mujhe ye saare masihaa aziiz hain lekin
ye kah rahe hain ki main tum se faasla rakkhun

suraj ke ufuq hote hain manzil nahin hoti
so Dhaltaa rahaa jaltaa rahaa chaltaa rahaa main

itni siyaah-raat mein itni si raushni
ye chaand vo nahin miraa mahtaab aur hai

sabhi se jab mohabbat chaahte ho
mohabbat kyon nahin karte sabhi se

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

mohabbaton ko kahin se madad nahin milti
ye jang aisi hai jis mein rasad nahin milti

mohabbatein to huiin aur tum se pahle bhi
magar jo tum se hui yaad karte rahte hain

ye kyaa hai mohabbat mein to aisaa nahin hotaa
main tujh se judaa ho ke bhi tanhaa nahin hotaa

ye vasl ki khvaahish bhi miyaan bul-havasi hai
jis dil mein mohabbat ho tamanna nahin hoti