main ne kahaa thaa mujh ko andhere kaa khauf hai — Seema Ghazal

khud apne-aap se milne ki khaatir
abhi koson mujhe chalnaa paDegaa

— Seema Ghazal

ek aavaaz main ne suni thi abhi kaun bolaa thaa ye to khabar hi nahin
ye ta'alluq zaruri hai kis ne kahaa vo bhi khaamosh thaa main bhi khaamosh thi

— Seema Ghazal

aise kuchh haadse bhi guzre hain
jin pe main aaj tak nahin roi

— Seema Ghazal

jazbon par jab barf jame to jiinaa mushkil hotaa hai
dil ke aatish-daan mein thoDi aag jalaani paDti hai

— Seema Ghazal

mujh ko us ke nahin khud mere havaale karte
kam se kam ye to mire chaahne vaale karte

— Seema Ghazal

main ek roz use DhunD kar to le aauun
vo apni zaat se baahar kahin mile to sahi

— Seema Ghazal

donon ke dil mein khauf thaa maidaan-e-jang mein
donon kaa khauf faasla thaa darmiyaan kaa

— Mohammad Alvi

leaderi chaaho to lafz-e-qaum hai mehmaan-navaaz
gap-navison ko aur ahl-e-mez ko raazi karo

— Akbar Allahabadi

ham mai-kashon ko Dar nahin marne kaa mohtasib
firdaus mein bhi sunte hain nahr-e-sharaab hai

— Imam Bakhsh Nasikh

buzurgon kaa mire dil se abhi tak Dar nahin jaataa
ki jab tak jaagti rahti hai maan main ghar nahin jaataa

— Munawwar Rana

khudaa se Darte to khauf-e-khudaa na karte ham
ki yaad-e-but se haram mein bukaa na karte ham

— Qalaq Merathi

is qadar aap ke badle hue tevar hain ki main
apni hi chiiz uThaate hue Dar jaataa huun

— Ahmad Kamal Parwazi