baagh kaa dard usi phuul ke dil se puchho — Shahab Sarmadi

nahin ki zindagi hamein kahaan kahaan liye phiri
hai yuun ki ham gae use kahaan kahaan liye hue

— Shahab Sarmadi

chaand hai teraa ham-safar koi nahin hai raahbar
aage qadam baDhaa ke rakh duur ki raushni na dekh

— Shahab Sarmadi

tum khud hi chale aaoge shaayad sar-e-manzil
ik raah nikaali hai miri dar-badari ne

— Shahab Sarmadi

is ehtimaam se aksar uThe hain paimaane
ki buund buund ko main jaanon yaa khudaa jaane

— Shahab Sarmadi

tiraa khayaal de gayaa hai aasraa kahin kahin
tiraa firaaq hausle baDhaa gayaa kabhi kabhi

— Shahab Sarmadi

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

jab ki pahlu se yaar uThtaa hai
dard be-ikhtiyaar uThtaa hai

— Mir Taqi Mir

ye aansu ponchh lijiye aur muskuraaiye
chaara nahin hai koi bhi rukhsat kiye baghair

— Nasim Zahid

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

— Nazeer Akbar Abadi

main ne apni palkon par gham-kade sajaae hain
aarzu ke maatam mein sogvaar hasti hai

— Hanif Fauq

husn jalva dikhaa gayaa apnaa
ishq baiThaa rahaa udaas kahin

— Saifuddin Saif