vahaan ki raushniyon ne bhi zulm Dhaae bahut — Shakeb Jalali

aalam mein jis ki dhuum thi us shaahkaar par
dimak ne jo likhe kabhi vo tabsire bhi dekh

— Shakeb Jalali

dil saa anmol ratan kaun kharidegaa 'shakeb'
jab bikegaa to ye be-daam hi bik jaaegaa

— Shakeb Jalali

rote hain dil ke zakhm to hanstaa nahin koi
itnaa to faaeda mujhe tanhaaiyon se hai

— Shakeb Jalali

khud apni aag se shaayad gudaaz ho jaaein
paraai aag se kab sang-dil pighalte hain

— Shakeb Jalali

ham-safar rah gae bahut pichhe
aao kuchh der ko Thahar jaaein

— Shakeb Jalali

jo motiyon ki talab ne kabhi udaas kiyaa
to ham bhi raah se kankar sameT laae bahut

— Shakeb Jalali

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

— Nazeer Akbar Abadi

kis ko fursat thi ki 'akhtar' dekhtaa meri taraf
main jahaan jis bazm mein jab tak rahaa tanhaa rahaa

— Akhtar Saeed Khan

jab bhi vo mujh se milaa rone lagaa
aur jab tanhaa huaa rone lagaa

— Zafar Hameedi

meri chaadar to chhini thi shaam ki tanhaai mein
be-ridaai ko miri phir de gayaa tashhir kaun

— Parveen Shakir

dasht ki naa-tamaam raahon par
koi saathi hai to shajar tanhaa

— Vijay Sharma

jo dil ne kahi lab pe kahaan aai hai dekho
ab mahfil yaaraan mein bhi tanhaai hai dekho

— Zehra Nigaah