be-khabar phuul ko bhi khinch ke patthar pe na maar — Shamim Karhani

piine ko is jahaan mein kaun si mai nahin magar
ishq jo baanTtaa hai vo aab-e-hayaat aur hai

— Shamim Karhani

bujhaa hai dil to na samjho ki bujh gayaa gham bhi
ki ab charaagh ke badle charaagh ki lau hai

— Shamim Karhani

chup huun tumhaaraa dard-e-mohabbat liye hue
sab puchhte hain tum ne zamaane se kyaa liyaa

— Shamim Karhani

lijiye bulaa liyaa aap ko khayaal mein
ab to dekhiye hamein koi dekhtaa nahin

— Shamim Karhani

vo dil bhi jalaate hain rakh dete hain marham bhi
kyaa turfa tabiat hai shola bhi hain shabnam bhi

— Shamim Karhani

yaad-e-maazi gham-e-imroz umid-e-fardaa
kitne saae mire hamraah chalaa karte hain

— Shamim Karhani

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

— Ibn

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

sabhi se jab mohabbat chaahte ho
mohabbat kyon nahin karte sabhi se

— Saleem Amrohvi

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

— Haidar Ali Aatish

sau fasaad ek ishq mein uTThe
boyaa ik tukhm uge hazaar darakht

— Imdad Ali Bahr

sach ishq mein hain aashiq o maashuq baraabar
jo mushkil-e-majnun hai so hai mushkil-e-lailaa

— Mushafi Ghulam Hamdani