ai inqalaab-e-nau tiri raftaar dekh kar — Shaukat Pardesi

ye kaisi be-qaraari sunne vaalon ke dilon mein hai
varaq dohraa rahaa hai kyaa koi meri kahaani kaa

— Shaukat Pardesi

un ki nigaah-e-naaz ki gardish ke saath saath
mahsus ye huaa ki zamaana badal gayaa

— Shaukat Pardesi

us ki hansi tum kyaa samjho
vo jo pahron royaa hai

— Shaukat Pardesi

sharik-e-dard nahin jab koi to ai 'shaukat'
khud apni zaat ki bechaargi ghanimat hai

— Shaukat Pardesi

apne paraae thak gae kah kar har koshish bekaar rahi
vaqt ki baat samajh mein aai vaqt hi ke samjhaane se

— Shaukat Pardesi

hudud-e-jism se aage baDhe to ye dekhaa
ki tishnagi thi barahna tiri adaaon tak

— Shaukat Pardesi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

— Parveen Shakir

jinhein ye fikr nahin sar rahe rahe na rahe
vo sach hi kahte hain jab bolne pe aate hain

— Aabid Adeeb

sunaa hai vo mire baare mein sochtaa hai bahut
khabar to hai hi magar mo'tabar zyaada nahin

— Zafar Iqbal

qulzum-e-fikr mein hai kashti-e-imaan saalim
naa-khudaa husn hai aur ishq hai langar apnaa

— Sahir Dehlavi

jab bhi ye sochne lagtaa huun ki kaun apnaa hai
zehn mein aa ke kai naam nikal jaate hain

— Abdul Wahab Sukhan

har subh nikalte hain yahi soch ke ghar se
bikhri hui duniyaa ko sameTeinge kisi din

— Sayyed Riyaz Raheem