baDe hausle the pahle baDe valvale the pahle — Shauq Bahraichi

barbaad gulistaan karne ko bas ek hi ullu kaafi thaa
har shaakh pe ullu baiThaa hai anjaam-e-gulistaan kyaa hogaa

— Shauq Bahraichi

har mulk is ke aage jhuktaa hai ehtiraaman
har mulk kaa hai father hindostaan hamaaraa

— Shauq Bahraichi

abhi to hazrat-e-vaaiz mazammat mai ki karte hain
agar mai-khaane mein un kaa guzar hogaa to kyaa hogaa

— Shauq Bahraichi

bhalaa 'shauq' dekhun kyunkar rukh-e-pur-shikan kaa manzar
mire daant hi kahaan hain jo main khaa sakun chhuaaraa

— Shauq Bahraichi

hamaare rahbaraan-e-qaum-o-millat 'shauq' kyaa kam hain
vatan mein gar na koi barber hogaa to kyaa hogaa

— Shauq Bahraichi

zindagi phaili hui thi shaam-e-hijraan ki tarah
kis ko itnaa hausla thaa kaun ji kar dekhtaa

— Ahmad Faraz

dasht-e-junun ki khaak uDaane vaalon ki himmat dekho
TuuT chuke hain andar se lekin man-maani baaqi hai

— Kumar Pashi

bhaarat ke ai saputo himmat dikhaae jaao
duniyaa ke dil pe apnaa sikka biThaae jaao

— Lal Chand Falak

vaqt ki gardishon kaa gham na karo
hausle mushkilon mein palte hain

— Mahfuzur Rahman Adil

mat baiTh aashiyaan mein paron ko sameT kar
kar hausla kushaada fazaa mein uDaan kaa

— Mahfuzur Rahman Adil

ye kah ke dil ne mire hausle baDhaae hain
ghamon ki dhuup ke aage khushi ke saae hain

— Mahirul Qadri