ai taab-e-barq thoDi si taklif aur bhi — Shefta Mustafa Khan

ham taalib-e-shohrat hain hamein nang se kyaa kaam
badnaam agar honge to kyaa naam na hogaa

— Shefta Mustafa Khan

itni na baDhaa paaki-e-daamaan ki hikaayat
daaman ko zaraa dekh zaraa band-e-qabaa dekh

— Shefta Mustafa Khan

izhaar-e-ishq us se na karnaa thaa 'sheftaa'
ye kyaa kiyaa ki dost ko dushman banaa diyaa

— Shefta Mustafa Khan

hazaar daam se niklaa huun ek jumbish mein
jise ghurur ho aae kare shikaar mujhe

— Shefta Mustafa Khan

shaayad isi kaa naam mohabbat hai 'sheftaa'
ik aag si hai siine ke andar lagi hui

— Shefta Mustafa Khan

fasaane yuun to mohabbat ke sach hain par kuchh kuchh
baDhaa bhi dete hain ham zeb-e-daastaan ke liye

— Shefta Mustafa Khan

jab ki pahlu se yaar uThtaa hai
dard be-ikhtiyaar uThtaa hai

— Mir Taqi Mir

ai soz-e-jaan-gudaaz abhi main javaan huun
ai dard-e-laa-ilaaj ye umr-e-shabaab hai

— Akhtar Ansari

ab un se paai hai taklif to shikaayat kyaa
hamin ne sar pe chaDhaayaa thaa kuchh kaminon ko

— Wafa Naqvi

kyuun nahin letaa hamaari tu khabar ai be-khabar
kyaa tire aashiq hue the dard-o-gham khaane ko ham

— Nazeer Akbar Abadi

pahlu mein mere dil ko na ai dard kar talaash
muddat hui gharib vatan se nikal gayaa

— Ameer Minai

kaaba bhi ham gae na gayaa par buton kaa ishq
is dard ki khudaa ke bhi ghar mein davaa nahin

— Ameer Minai