hamaare naam likhi jaa chuki thi rusvaai — Siddique Mujibi

uThe hain haath to apne karam ki laaj bachaa
vagarna meri duaa kyaa miri talab kyaa hai

khud pe kyaa biit gai itne dinon mein tujh bin
ye bhi himmat nahin ab jhaank ke andar dekhun

main vo TuuTaa huaa taaraa jise mahfil na raas aai
main vo shola jo shab bhar aankh ke paani mein rahtaa hai

main ne hansne ki aziyyat jhel li royaa nahin
ye saliqa bhi koi aasaan jiine kaa na thaa

ek bechain samundar hai mire jism mein qaid
TuuT jaae jo ye divaar to manzar dekhun

naakhudaa ho ki khudaa dekhte rah jaate hain
kashtiyaan Dubti hain us ke makin Dubte hain

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa