ye sikhaayaa hai dosti ne hamein — Sudarshan Faakir

dil to rotaa rahe aur aankh se aansu na bahe
ishq ki aisi rivaayaat ne dil toD diyaa

— Sudarshan Faakir

har taraf ziist ki raahon mein kaDi dhuup hai dost
bas tiri yaad ke saae hain panaahon ki tarah

— Sudarshan Faakir

tere jaane mein aur aane mein
ham ne sadiyon kaa faasla dekhaa

— Sudarshan Faakir

mere dukh ki koi davaa na karo
mujh ko mujh se abhi judaa na karo

— Sudarshan Faakir

meraa qaatil hi meraa munsif hai
kyaa mire haq mein faisla degaa

— Sudarshan Faakir

rone vaalon se kaho un kaa bhi ronaa ro lein
jin ko majburi-e-haalaat ne rone na diyaa

— Sudarshan Faakir

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

— Ibn

jab ki pahlu se yaar uThtaa hai
dard be-ikhtiyaar uThtaa hai

— Mir Taqi Mir

kaabe ko jaataa kis liye hindostaan se main
kis but mein shahr-e-hind ke shaan-e-khudaa na thi

— Rind Lakhnavi

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

— Nida Fazli

dekhe na mujhe kyunkar az-chashm-e-hiqaarat-u
vo sarv-e-javaan yaaro man-faakhta-e-piram

— Nazeer Akbar Abadi

yaad aai hai to phir TuuT ke yaad aai hai
koi guzri hui manzil koi bhuli hui dost

— Ahmad Faraz