niind ban kar miri aankhon se mire khuun mein utar — Waheed Akhtar

zer-e-paa ab na zamin hai na falak hai sar par
sail-e-takhliq bhi girdaab kaa manzar niklaa

— Waheed Akhtar

harf-e-inkaar hai kyuun naar-e-jahannam kaa halif
sirf iqraar pe kyuun baab-e-iram khultaa hai

— Waheed Akhtar

maangne vaalon ko kyaa izzat o rusvaai se
dene vaalon ki amiri kaa bharam khultaa hai

— Waheed Akhtar

jo sunnaa chaaho to bol uTTheinge andhere bhi
na sunnaa chaaho to dil ki sadaa sunaai na de

— Waheed Akhtar

hazaaron saal safar kar ke phir vahin pahunche
bahut zamaana huaa thaa hamein zamin se chale

— Waheed Akhtar

bichhDe hue khvaab aa ke pakaD lete hain daaman
har raasta parchhaaiyon ne rok liyaa hai

— Waheed Akhtar

jhaankte raat ke garebaan se
ham ne sau aaftaab dekhe hain

— Salman Akhtar

raushni ho rahi hai kuchh mahsus
kyaa shab aakhir tamaam ko pahunchi

— Aslam Farrukhi

shor din ko nahin sone detaa
shab ko sannaaTaa jagaa detaa hai

— Saifuddin Saif

huaa hai shah kaa musaahib phire hai itraataa
vagarna shahr mein 'ghaalib' ki aabru kyaa hai

— Mirza Ghalib

shab-e-vaada fasil-e-hijr se aage chamaktaa hai tiraa ism-e-sitaara-ju
ki jaise koi paivand-e-ridaa-e-subh aa jaae kisi qindil ki zad mein

— Zahid Masood

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

— Zafar Iqbal