hijr se vasl ki itni thi masaafat yaaro — Zahoor Chohan

aakhiri baar mulaaqaat to kar li hai magar
silsila apni mohabbat kaa kahaan aakhiri hai

— Zahoor Chohan

rahtaa huun main jitnaa saath sab ke
lagtaa hai akelaa ho gayaa huun

— Zahoor Chohan

main apne aap mein taqsim hone lagtaa huun
use kaho ki mire saamne na aayaa kare

— Zahoor Chohan

kabhi kabhi to miraa ghar bhi mujh se puchhtaa hai
ki is jahaan mein koi teraa ghar bhi hai ki nahin

— Zahoor Chohan

inhi jhuke hue peDon se guftugu hai miri
janaab mere buzurgon se guftugu hai miri

— Zahoor Chohan

puuri ho jaati agar koi kahaani hoti
ye mohabbat hai miyaan is mein kasak rahti hai

— Zahoor Chohan

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

— Ibn

jab ki pahlu se yaar uThtaa hai
dard be-ikhtiyaar uThtaa hai

— Mir Taqi Mir

kaabe ko jaataa kis liye hindostaan se main
kis but mein shahr-e-hind ke shaan-e-khudaa na thi

— Rind Lakhnavi

baat karnaa pyaar ki aasaan se aasaan hai
ishq karnaa karte rahnaa hai kaThin se bhi kaThin

— Raghvendra Dwivedi

dekhe na mujhe kyunkar az-chashm-e-hiqaarat-u
vo sarv-e-javaan yaaro man-faakhta-e-piram

— Nazeer Akbar Abadi

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

— Nida Fazli