yaad itnaa hai ki main hosh ganvaa baiThaa thaa — Zaki Kakorvi

yaad aae hain uff gunah kyaa kyaa
haath uThaae hain jab duaa ke liye

— Zaki Kakorvi

aql ne tark-e-taalluq ko ghanimat jaanaa
dil ko badle hue haalaat pe ronaa aayaa

— Zaki Kakorvi

tiri javaan umangon ko ho gayaa hai kyaa
Dari Dari si mohabbat mujhe pasand nahin

— Zaki Kakorvi

junun ke kaif-o-kam se aagahi tujh ko nahin naaseh
guzarti hai jo divaanon pe divaane samajhte hain

— Zaki Kakorvi

log kahte rahe qarib hai vo
ham ne DhunDaa to duur duur na thaa

— Zaki Kakorvi

ye raat yunhi basar ho gai to kyaa hogaa
tire baghair sahar ho gai to kyaa hogaa

— Zaki Kakorvi

mere khvaabon ke jharokon ko sajaate rahiye
na sahi vasl magar yaad to aate rahiye

— Jatinder Vir Yakhmi Jayaveer

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

koi viraani si viraani hai
dasht ko dekh ke ghar yaad aayaa

— Mirza Ghalib

yaad aai hai to phir TuuT ke yaad aai hai
koi guzri hui manzil koi bhuli hui dost

— Ahmad Faraz

ek parchhaain tasavvur ki mire saath rahe
main tujhe bhulun magar yaad mujhe tu aae

— Gulnar Aafreen

uThaa sakte nahin jab chuum kar hi chhoDnaa achchhaa
mohabbat kaa ye patthar is dafa bhaari ziyaada hai

— Zafar Iqbal