dekh phulon se lade dhuup nahaae hue peD — Zia Jalandhari

buraa na maan 'ziyaa' us ki saaf-goi kaa
jo dard-mand bhi hai aur be-adab bhi nahin

— Zia Jalandhari

rang baatein karein aur baaton se khushbu aae
dard phulon ki tarah mahke agar tu aae

— Zia Jalandhari

himmat hai to buland kar aavaaz kaa alam
chup baiThne se hal nahin hone kaa masala

— Zia Jalandhari

ishq mein bhi koi anjaam huaa kartaa hai
ishq mein yaad hai aaghaaz hi aaghaaz mujhe

— Zia Jalandhari

ye aansu ye pashemaani kaa izhaar
mujhe ik baar phir bahkaa gai ho

— Zia Jalandhari

abr-e-aavaara se mujh ko hai vafaa ki ummid
barq-e-betaab se shikva hai ki paainda nahin

— Zia Jalandhari

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

qaatil tiri gali bhi badaun se kam nahin
jis ke qadam qadam pe mazaar-e-shahid hai

— Mushafi Ghulam Hamdani

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

— Irfan Sattar

kuchh phulon ki khaatir bhi kuchh phulon kaa
sab se achchhaa rang churaanaa paDtaa hai

— Nadeem Bhabha

sabza o gul kahaan se aae hain
abr kyaa chiiz hai havaa kyaa hai

— Mirza Ghalib

teraa ghar aur meraa jangal bhigtaa hai saath saath
aisi barsaatein ki baadal bhigtaa hai saath saath

— Parveen Shakir