us ke khat raat bhar yuun paDhtaa huun — Zubair Ali Tabish

bichhaD kar bhi huun zinda rahne vaalaa
tu hotaa kaun hai ye kahne vaalaa

— Zubair Ali Tabish

is dar kaa ho yaa us dar kaa har patthar patthar hai lekin
kuchh ne meraa sar phoDaa hain kuchh par main ne sar phoDaa hai

— Zubair Ali Tabish

aaj to dil ke dard par hans kar
dard kaa dil dukhaa diyaa main ne

— Zubair Ali Tabish

apnaa kangan samajh rahe ho kyaa
aur kitnaa ghumaaoge mujh ko

— Zubair Ali Tabish

koi titli nishaane par nahin hai
main bas rangon kaa pichhaa kar rahaa huun

— Zubair Ali Tabish

bas main maayus hone vaalaa thaa
aur maulaa ne tujh ko bhej diyaa

— Zubair Ali Tabish

jhaankte raat ke garebaan se
ham ne sau aaftaab dekhe hain

— Salman Akhtar

raushni ho rahi hai kuchh mahsus
kyaa shab aakhir tamaam ko pahunchi

— Aslam Farrukhi

shor din ko nahin sone detaa
shab ko sannaaTaa jagaa detaa hai

— Saifuddin Saif

us ko sochun to dhyaan mein mere
khushbu aati hai pahli baarish ki

— Vibha Jain 'Khwaab'

huaa hai shah kaa musaahib phire hai itraataa
vagarna shahr mein 'ghaalib' ki aabru kyaa hai

— Mirza Ghalib

tum aake lauT gae phir bhi ho yahin maujud
tumhaare jism ki khushbu mire makaan mein hai

— Abbas Dana