kitna buad hai mere fan aur peshe ke mabain — Tanveer Sipra

aaj bhi 'sipra' us ki khushbu mill malik le jaata hai
main lohe ki naaf se paida jo kasturi karta huun

— Tanveer Sipra

ab tak mire a.asab pe mehnat hai musallat
ab tak mire kanon men mashinon ki sada hai

— Tanveer Sipra

kabhi apne vasa.el se na baDh kar khvahishen paalo
vo pauda TuuT jaata hai jo la-mahdud phalta hai

— Tanveer Sipra

aaj itna jalao ki pighal jaa.e mira jism
shayad isi surat hi sukun paa.e mira jism

— Tanveer Sipra

sab ki nigah men tire godam aa ga.e
ab apne hathon maal ki taqsim kar na kar

— Tanveer Sipra

jo kar raha hai dusron ke zehn ka ilaaj
vo shakhs khud bahut baDa zehni mariz hai

— Tanveer Sipra