muñh jo dekhe ā.īna gar kāñch kā — All Writings Of Aajiz Hinganghat

"ḳhālī-uz-zehn hue jab se ḳhalāoñ kī tarah ham bhaTakte rahe be-lāg havāoñ kī tarah ḳhud-kushī jurm hai sangīn ḳhatāoñ kī tarah zindagī dekh idhar ham meñ ḳhudāoñ kī tarah kitnā āsān hai ehsās kī talḳhī kā 'ilāj zahr biktā hai sar-e-ām davāoñ kī tarah kyā muqaddar hai ki sūraj ke nagar meñ rah kar chāñd se log haiñ tārīk guphāoñ kī tarah haa.e is daur kī taqdīr meñ āvāz-e-azāñ kārgar kyoñ nahīñ meloñ kī sadāoñ kī tarah us ke jalte hue hoñToñ pe mirā naam 'ājiz' aaj bhī aatā hai majbūr du'āoñ kī tarah"

"umr be-vaj.h na be-rabt guzārī jaa.e aa.ina dekh ke tasvīr utārī jaa.e vahī kamra vahī ḳhushbū vahī har shab kī ghuTan aaj kī raat kahīñ aur guzārī jaa.e yuuñ zarūrat kī dukāñ se hai ta'alluq us kā jaise chaurāhe pe har roz bhikārī jaa.e ḳhauf āñkhoñ ke kaToroñ se chhalak jā.egā musht-bhar ḳhaak sahī chehre pe maarī jaa.e hai khañDar jism magar ruuh kī taskīñ ke liye būḌhī dīvār kisī tarah sañvārī jaa.e shaam hī se mire bistar kī shikan kahtī hai aaj bhī kal kī tarah raat na bhārī jaa.e apne takiye pe likhā us ne ye misrā 'ājiz' aañkh lag jaa.e to phir chīḳh na maarī jaa.e"

"zaḳhmoñ ke dahan bhar de ḳhanjar ke nishāñ le jā be-samt sadāoñ kī rif.at kā gumāñ le jā ehsās-e-basīrat meñ ibrat kā samāñ le jā ujḌī huī bastī se buniyād-e-makāñ le jā shahroñ kī fazāoñ meñ lāshoñ kā ta.affun hai jañgal kī havā aa jā jismoñ kā dhuāñ le jā hai aur abhī baaqī tārīk safar shab kā ugne de nayā sūraj phir chāhe jahāñ le jā jaltī huī rātoñ kā bujhtā huā manzar huuñ ghar aa ke kabhī 'ājiz' mujh se ye samāñ le jā"

"siina lahūluhān hai kaalī chaTān kā patthar meñ bhī gumān sā hotā hai jaan kā chhoTā sā ek tinkā chiḌiyā kī choñch meñ shahtīr lag rahā thā jo ūñche makān kā qindīl le ke ḳhud hī vo ḳhandaq meñ jā girā nā'ra lagā rahā thā abhī sāvdhān kā hai sāmne se aañkh milāne kā lutf aur khelegā kyā shikār shikārī machān kā 'ājiz' merī qamīz meñ aTkā thā jo kabhī tohfe kā thā vo phuul ki kāñTā thā jaan kā"

"jitnī tezī se aa rahā thā vo lauT kar duur jā rahā thā vo sirf rishte kī baat par yaaro umr apnī chhupā rahā thā vo titliyāñ jitnī sāmne aa.iiñ rañg sab ke churā rahā thā vo dil kisī se nahīñ milā us kā haath sab se milā rahā thā vo zaḳhm-ḳhurda sadāoñ ko 'ājiz' ḳhāmushī se uThā rahā thā vo"

"ek ik patā havāoñ se hai laḌne vaalā peḌ us kā nahīñ āñdhī se ukhaḌne vaalā raah chalte hue uñglī bhī kisī kī na pakaḌ bhiiḌ meñ hotā hai har shaḳhs bichhaḌne vaalā ik humakte hue bachche kī tarah zid na kar ḳhushnumā jism khilaunā hai bigaḌne vaalā ḳhatm mahloñ kī ravā-dārī kā dastūr huā ab yahāñ kaun hai dīvār meñ gaḌhne vaalā zindagī shahar basāne meñ hai masrūf 'ājiz' gaañv tūfān kī zad meñ hai ujaḌne vaalā"