Ghazal

"qafas tak bhī pahuñch hai yā faqat ik āshiyāñ tak hai rasā.ī dekhnī hai barq-e-sozāñ kī kahāñ tak hai mujhe lazzat-kash-e-bedād pā kar haath kyoñ rokā zarā to āzmāte hausla dil kā kahāñ tak hai yaqīñ apnī vafā par hai taġhāful kā nahīñ shikva tirī begāngī ham jānte haiñ imtihāñ tak hai nasheman phūñk kar zālim havā detā hai dāman kī ġhubār-e-ḳhātir-e-sayyād ḳhāk-e-āshiyāñ tak hai zarā sā dil hai lekin jaan hai bazm-e-do-ālam kī ye saarī garmī-e-hangāma qalb-e-nā-tavāñ tak hai shikast-e-dil kā baa.is ārzū-e-dil ko Thahrāyā gumān-e-nek tujh se bad-gumāñ dekhā kahāñ tak hai yahī rūh-e-tamanna hai yahī hai jān-e-dil 'kaifī' qafas meñ zindagī apnī ḳhayāl-e-āshiyāñ tak hai"

"ham tire husn-e-jahāñ-tāb se Dar jaate haiñ aise muflis haiñ ki asbāb se Dar jaate haiñ ḳhauf aisā hai ki duniyā ke satā.e hue log kabhī mimbar kabhī mehrāb se Dar jaate haiñ raat ke pichhle pahar niiñd meñ chalte hue log ḳhuun hote hue mahtāb se Dar jaate haiñ shaad rahte haiñ isī jāma-e-uryānī meñ haañ magar atlas-o-kamḳhvāb se Dar jaate haiñ kabhī karte haiñ mubāraz-e-talabī duniyā se aur kabhī ḳhvāhish-e-betāb se Dar jaate haiñ jī to kahtā hai ki chaliye usī kūche kī taraf ham tirī bazm ke ādāb se Dar jaate haiñ ham to vo haiñ ki jinheñ raas nahīñ koī nagar kabhī sāhil kabhī girdāb se Dar jaate haiñ"

"apnī āñkhoñ se tabāhī ye nazāra dekhūñ yā'nī tujh ko maiñ kisī aur kā hotā dekhūñ merī dīvāngī is moḌ pe le aa.ī hai har kisī chehre meñ bas ek hī chehra dekhūñ ye jo tasvīr musavvir ne banā.ī varna chāñd ko Thahre hue paanī meñ chaltā dekhūñ tishnagī laakh sahī par ye nahīñ ho saktā ḳhud ko lāchār banā.ūñ sū-e-dariyā dekhūñ ye tirī zid ki taḌaptā huā dekhe mujh ko merī ḳhvāhish ki hamesha tujhe hañstā dekhūñ sāmne tujh ko biThā.ūñ tirā māthā chūmūñ terī āñkheñ tirī zulfeñ tirā chehra dekhūñ do qadam chal ke ye dil ne kahā 'ādil-rāhī' āḳhirī baar palaT kar use jaatā dekhūñ"

"maiñ jāntā huuñ kaun huuñ maiñ aur kyā huuñ maiñ duniyā samajh rahī hai ki ik pārsā huuñ maiñ ab mujh meñ aur tujh meñ koī fāsla nahīñ tū merā mudda.ā hai tirā mudda.ā huuñ maiñ vaa.iz jabīn-e-shauq jhuke to kahāñ jhuke naqsh-e-qadam hī un ke abhī DhūñDhtā huuñ maiñ dil ko tajalliyāt kā markaz banā liyā ab un kā naam lene ke qābil huā huuñ maiñ nāseh tirī nigāh meñ bāda-parast huuñ mai-kash samajh rahe haiñ baḌā pārsā huuñ maiñ fursat mile kashākash-e-duniyā se to kahūñ kis vahm kis gumān meñ uljhā huā huuñ maiñ ahl-e-ḳhirad kī aql pahuñchtī nahīñ jahāñ 'vasfī' junūñ meñ aisī jagah aa gayā huuñ maiñ"

"ḳhālī-uz-zehn hue jab se ḳhalāoñ kī tarah ham bhaTakte rahe be-lāg havāoñ kī tarah ḳhud-kushī jurm hai sangīn ḳhatāoñ kī tarah zindagī dekh idhar ham meñ ḳhudāoñ kī tarah kitnā āsān hai ehsās kī talḳhī kā 'ilāj zahr biktā hai sar-e-ām davāoñ kī tarah kyā muqaddar hai ki sūraj ke nagar meñ rah kar chāñd se log haiñ tārīk guphāoñ kī tarah haa.e is daur kī taqdīr meñ āvāz-e-azāñ kārgar kyoñ nahīñ meloñ kī sadāoñ kī tarah us ke jalte hue hoñToñ pe mirā naam 'ājiz' aaj bhī aatā hai majbūr du'āoñ kī tarah"

"gul sadāqat se mahakte hue tāsīr meñ rakh sāneha dil pe jo guzre vahī tahrīr meñ rakh tāq-e-zindāñ meñ charāġh-e-ġham-e-hastī na jalā ātish-e-ishq-e-darūñ halqa-e-zanjīr meñ rakh ḳhisht-e-be-faiz jo ārāsta guftār meñ hai us ko buniyād banā kar kisī ta.amīr meñ rakh zulmatoñ se kisī ghar kī nahīñ hotī pahchān sang-o-gul hī nahīñ kuchh nuur bhī jāgīr meñ rakh kab talak dosh pe ḳhvāboñ ke karegā parvāz ham-nashīñ azm-e-safar vādī-e-tā'bīr meñ rakh diid kī ziist se tā-marg talab aa pahuñchī hīla-jū aur bahāne tū na tāḳhīr meñ rakh sarvarī zor-e-takallum se na mil pā.egī ham-nashīñ ijz-e-bayāñ ḳhūbī-e-taqrīr meñ rakh"

"har ik dīvār har ik dar hamārā mileñ gar ban nahīñ hai ghar hamārā raqābat duur se kariyo hamārī muqarrar sher hai dīgar hamārā jahāñ par jā ke āmāda paḌho ho vahāñ par zikr hai din bhar hamārā shitābī hai nahīñ ham ko suḳhan kī hameñ andāz hai andar hamārā nishāñ apnā na pūchho hai kidhar tak hamārā hai idhar ūdhar hamārā ġhulāmī tum karo apnā zamāñ hai hukm nīche se hai uupar hamārā faqīrī se subukdoshī mile kab adam se qabl hai mahshar hamārā 'abān'-e-dar-ba-dar ye chāk-jebī kisū se jal gayā bistar hamārā"

"vafādārī pe de dī jaan ġhaddārī nahīñ aa.ī hamāre ḳhuun meñ ab tak ye bīmārī nahīñ aa.ī ḳhudā kā shukr sohbat kā asar hotā nahīñ ham par adākāroñ meñ rah kar bhī adākārī nahīñ aa.ī amīr-e-shahr ho kar bhī nahīñ koī tirī izzat tire hisse meñ ġhairat aur ḳhuddārī nahīñ aa.ī hamārī dars-gāhoñ kī nizāmat aisī bigḌī hai kitābeñ paḌh ke bhī bachchoñ meñ hushyārī nahīñ aa.ī lagā.ī aag us ne shahr meñ itnī safā.ī se ki us ke ghar pe uḌ ke ik bhī chingārī nahīñ aa.ī abhī se kis liye beTe ko bhejeñ naukrī karne hamāre dast-o-pā meñ itnī lāchārī nahīñ aa.ī maiñ nādānī pe apnī aaj tak hairān huuñ 'dānā' ki duniyā ko samajhne kī samajhdārī nahīñ aa.ī"

"saudā barā.e zindagī āsān kar diyā jo bik nahīñ rahā thā use daan kar diyā puurī ġhazal kā lutf uThā hī nahīñ sake matle' ne is qadar hameñ hairān kar diyā mahfil meñ koī husn kā misra' agar milā itne sunā.e she'r ki dīvān kar diyā paanī pahan ke dauḌ lagā dī galī galī dariyā ne khel khel meñ nuqsān kar diyā ham toḌne ga.e the nasīhat kī boTiyāñ order janāb-e-shaiḳh ne jalpān kar diyā mushkil meñ paḌ ga.e tire chakkar meñ ḳhud magar ḳhush haiñ ki rāsta tirā āsān kar diyā sachchā.iyoñ ne ḳhvāb ke sab ḳheme Dhā diye aur 'āshiqoñ ko be-sar-o-sāmān kar diyā"

"fat.h kitnī ḳhūb-sūrat hai magar kitnī garāñ bārhā rad kī hai maiñ ne dāvat-e-vasl-e-butāñ naġhma-e-bulbul hai faryād-e-vidā-e-fasl-e-gul sa.ī-e-hāsil dar-haqīqat hai matā-e-rā.egāñ zinda rahne ke haiñ imkānāt kyā āsār kyā kaun sī qadreñ haiñ baaqī kaun sī sachchā.iyāñ shā'iroñ kā kaam kyā tansīq-e-ausāf-o-luġhūt yā sanā shāhoñ kī yā mad.h-e-sarāpā-e-butāñ zahr hai fan ke liye darbār-dārī kā mizāj kam-tarīn-e-shart-e-goyā.ī hai iḳhlās-e-bayāñ tere hāthoñ par lagā hai be-gunāhoñ kā lahū jām-e-jam meñ mai nahīñ ḳhūn-e-siyādish hai muġhāñ maiñ to piitā huuñ faqat gulnār hoñToñ kī sharāb sabbeh-ism-e-rabbekal-ālā rahe vird-e-zabāñ ḳhatm haiñ is shoḳh rā.anā par tarah-dārī ke rang qadd-e-bālā jis kā hai rashk-e-qazīb-e-ḳhaizrāñ jhanjhanā uThne ko haiñ betāb tan biinā ke taar kaun laa.e taab husn-e-be-hijāb-e-mah-vashāñ be-niyāz-e-harf hai guftār-e-chashm-e-pur-suḳhan darmiyān-e-mahramān-e-jāñ hai nā-mahram zabāñ koī tanhā.ī kā gosha koī kunj-e-āfiyat 'āshiq-o-mā'shūq yakjā hoñ kahāñ ai āsmāñ ai muhibbo rāh-e-ulfat meñ har ik shai hai mubāh kis ne khīñchā hai ḳhat-e-hijrāñ tumhāre darmiyāñ titliyāñ dekhī haiñ baiThī ḳhushk phūloñ par kabhī hājateñ apnī karo tum ḳhūb-rūoñ se bayāñ ham ne nīñdeñ de ke rātoñ se ḳharīde ratjage ham se kam hoñge ukāz-e-dahr meñ bāzārgāñ rāt-din sunte haiñ tasvīlāt-e-arbāb-e-hasad ehtiyāj-e-dushmanāñ bhī hai hunar ko be-gumāñ jaane kin auqāt meñ likhtā thā qānūn-o-shifā bū-alī-sīnā vo maqtūl-e-muġhāñ sheva-butāñ maut se vahshat hai logoñ ko mohabbat maal se bāñg-e-be-hañgām hai kūs-e-rahīl-e-kārvāñ hai qarīb ai shab zarā sub.h-e-qayāmat kā tulūa TūTne ko hai azal-tābāñ tanāb-e-kahkashāñ tum akele aa.e duniyā meñ akele jāoge zindagī ik pal hai kyā pul par banāte ho makāñ ḳhizr zinda hai magar zindānī-e-umr-e-abad ai ajal kis kaam kī aisī hayāt-e-jāvidāñ maiñ bhī huuñ mānind māmūñ ke amīr-ul-kāfrīñ bas-ki huuñ vārafta-e-fikr-o-fan-e-yūnāniyāñ hai sulaimāñ kī taraf vāqif lisān-uttair se shā.ir-e-zohra-nigāhāñ ḳhālid-e-uqda-zabāñ go harīm-e-āgahī kī shakl bhī dekhī nahīñ hai ba-zom-e-ḳhvesh dānā-e-rumūz-e-kun-fakāñ"

"ma.āl-e-sabr hai merā nashāt-e-hasrat-afzā.ī tabī'at bazm kī ḳhūgar magar qismat hai tanhā.ī achānak un ḳhayāl-angez āñkhoñ meñ chamak aa.ī bas itnī baat kaafī thī mujhe hone ko saudā.ī zahe-uzlat ki jaarī hai ba-shakl-e-ḳhvāb bedārī sar-e-shām-e-tamannā ehtimām-e-bazm-ārā.ī 'adū kī fauj saf-basta musallah bhī munazzam bhī magar ham haiñ abhī ġharq-e-ḳhayāl-e-razm-ārā.ī savāl is kā nahīñ vīrān hai dil mas.ala ye hai agar andar na thā koī to phir kis kī sadā aa.ī darīchoñ par koī bandish nahīñ thī aaj phir 'ḳhālid' koī bhūlī huī ḳhushbū havā ke saath dar aa.ī"

"yuuñ ashk baraste haiñ mire dīda-e-tar se jis tarah se sāvan kī ghaTā jhuum ke barse haañ ashk-e-nadāmat jo gire dīda-e-tar se vo dāman-e-isyāñ pe nazar aa.e guhar se māhaul to badlā hai mirī jehd ne aksar haañ maiñ nahīñ badlā kabhī māhaul ke Dar se duniyā na kahīñ mujh ko nigāhoñ se girā de ab itnā girā do na mujhe apnī nazar se dekhe jo koī sāda-mizājī to ye samjhe vāqif hī nahīñ aap kisī aib-o-hunar se jis raah meñ guzrī hai mire sar pe qayāmat sau baar to guzrā huuñ usī rāhguzar se is vaqt jo guzrī hai na pūchho use 'vasfī' Takrā.ī hai jab un kī nazar merī nazar se"

"chashm-e-girya pe dhuāñ thā pahle din meñ bhī shab kā gumāñ thā pahle zaḳhm to thā magar ai rāhat-e-jāñ is qadar dard kahāñ thā pahle naam lenā bhī nahīñ ab to ravā maiñ tire dil kī zabāñ thā pahle tere chhūne se huā huuñ sarsabz maiñ to ik barg-e-ḳhizāñ thā pahle jam gayā tere bichhaḌne se lahū ye rag-o-pai meñ ravāñ thā pahle ab nikaltā nahīñ ghar se 'adnān' shahr kī rūh-e-ravāñ thā pahle"

"rūdād-e-ġham meñ DhūñDiye lutf-e-bayāñ nahīñ ye to hadīs-e-dil hai koī dāstāñ nahīñ shikva nahīñ gila nahīñ āh-o-fuġhāñ nahīñ apnā jo haal hai vo kisī par ayaañ nahīñ apnā yaqīñ kabhī bhī asīr-e-gumāñ nahīñ ai shaiḳh un ke mere koī darmiyāñ nahīñ ai dil jafā-e-ahl-e-jahāñ se na ho malūl in kī razā jo ho to musībat garāñ nahīñ kyā DhūñDhtā hai is meñ ġham-o-rañj ke sivā ye merī dāstāñ hai tirī dāstāñ nahīñ ishq-e-sitam samajh ke zarā ai nigāh-e-dost ye terā imtihāñ hai mirā imtihāñ nahīñ hairān huuñ vahāñ maiñ kahūñ kyā zabān se 'āsī' nigāh dil kī jahāñ tarjumāñ nahīñ"

"faḳhr samjhā dar-e-dildār pe mar jaane ko kaise dānā.ī ye sūjhī tire dīvāne ko nāz-bardāroñ pe sab naaz huā karte haiñ kaun taklīf diyā karte haiñ begāne ko kyoñ vasīle kī zarūrat ho tirī chāhat meñ kyā sikhātā hai mohabbat koī parvāne ko maiñ to jannat meñ bhī jaane kā kabhī naam na luuñ jab tak ā.eñgī na hūreñ mire le jaane ko us ke va.adoñ se ho kyā ḳhaak tasallī 'saifī' der lagtī hī nahīñ jis ke mukar jaane ko"

"vafā.eñ hoñgī zeb-e-tāq-e-nisyāñ ham na kahte the bhulā baiThoge tum sab ‘ahd-o-paimāñ ham na kahte the mileñge ḳhaak meñ sab dil ke armāñ ham na kahte the chaman ban jā.egā ḳhvāb-e-pareshāñ ham na kahte the uThāoge na kuchh lutf-e-bahārāñ ham na kahte the karoge tum bhī ik din chaak dāmāñ ham na kahte the chhupāoge tum apnā dard-e-dil kab tak tasanno' se ubhar aa.egā āḳhir zaḳhm-e-pinhāñ ham na kahte the milegī lazzat-e-kām-o-dahan jab ḳhūn-e-nāhaq se baḌhegā aur bhī ye zauq-e-‘isyāñ ham na kahte the raqābat kashmakash aur ye kudūrat ahl-e-gulshan kī lahū rulvā.egī fasl-e-bahārāñ ham na kahte the manāo ḳhair apnī ab mirā ghar phūñkne vaalo kahīñ tum bhī na ho sho’la-ba-dāmāñ ham na kahte the jidhar dekho 'zakī' taḳhrīb kī farmāñ-ravā.ī hai uThegā ḳhaak ke zarroñ se tūfāñ ham na kahte the"

"jaane kis samt ko bhaTkā saaya dhuup kahne lagī sāya! sāya! koī sarnāma hamārā likkhe raḳhsh par ham to piyāda saaya sar-e-be-maġhz ke auhām to dekh jism apnā hai parāyā saaya ye adāvat hai hiqārat to nahīñ un kī dastār se rūThā saaya ba.az auqāt to aisā bhī huā chhin gayā ham se hamārā saaya ab to e.ajāz hai jiinā 'ābid' saa.e kā ho bhī bhalā kyā saaya"

"na ham apne na vo apne na dil apnā na raaz apnā man-o-tū ke jahāñ meñ hai yahī bas imtiyāz apnā zabāñ un kī hai zikr un kā ḳhayāl un kā hai yaad un kī na harf-e-naġhma apnā hai na koī tār-e-sāz apnā do ik be-rang aañsū haiñ do ik be-rabt bāteñ haiñ na rūdād apnī tūlānī na afsāna darāz apnā nahīñ mā'lūm ki kaun aa.egā kab aa.egā lekin dar-e-dīda bhī vā hai aur dar-e-dil bhī hai baaz apnā ġham-e-jāñ māya-e-rahmat ġham-e-jāñ daulat-e-taskīñ yahī kuchh kā.enāt apnī yahī kuchh barg-o-sāz apnā bi-hamdillāh apnī chashm-e-tar hai bā-vazū daa.im bi-hamdillāh dil har dam hai masrūf-e-namāz apnā dil apnā saaf hai mānind-e-māh-e-zau-fishāñ 'fitrat' 'ayāñ haiñ sab pe aur rakhte nahīñ haiñ koī raaz apnā"