use chhat par khaDe dekhaa thaa main ne — Bimal Krishn Ashk

ab yahi dukh hai hamin mein thi kami us mein na thi
us ko chaahaa thaa magar apni tarah chaahaa na thaa

aisaa huaa ki ghar se na niklaa tamaam din
jaise ki khud se aaj koi kaam thaa mujhe

sabhi insaan farishte ho gae hain
kisi divaar mein saaya nahin hai

main band kamre ki majburiyon mein leTaa rahaa
pukaarti phiri baazaar mein havaa mujh ko

badan ke loch tak aazaad hai vo
use tahzib ne baandhaa nahin hai

daaera khinch ke baiThaa huun baDi muddat se
khud se niklun to kisi aur kaa rasta dekhun