apne gird-o-pesh kaa bhi kuchh pataa rakh — Kumar Pashi

koi to DhunD ke mujh ko kahin se le aae
ki khud ko dekhaa nahin hai bahut zamaanon se

— Kumar Pashi

hain saare inkishaaf apne hain saare mumkinaat apne
ham is duniyaa kaa saaraa ilm le jaaeinge saath apne

— Kumar Pashi

kuchh ghazlein un zulfon par hain kuchh ghazlein un aankhon par
jaane vaale dost ki ab ik yahi nishaani baaqi hai

— Kumar Pashi

oDh liyaa hai main ne libaadaa shishe kaa
ab mujh ko kisi patthar se Takraane do

— Kumar Pashi

teri yaad kaa har manzar pas-manzar likhtaa rahtaa huun
dil ko varaq banaataa huun aur shab bhar likhtaa rahtaa huun

— Kumar Pashi

din chaDh aayaa kyon nahin aae jaaein un se puchh aaein
lekin un ke paas to ai dil koi bahaana hogaa hi

— Kumar Pashi

main baDaa ho gayaa huun magar bachpanaa
mere dil se kabhi bhi gayaa hi nahin

— Divyansh Rawat

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

— Shakeel Badayuni

us ke munh pe mukar gayaa thaa dil
aaj had se guzar gayaa thaa dil

— Divyansh Rawat

chaand ne taan li hai chaadar-e-abr
ab vo kapDe badal rahi hogi

— Jaun Elia

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai

— Zafar Iqbal