Mirza Ghalib

hum ko un se wafa ki hai ummeed jo nahin jaante wafa kya hai

har ek baat pe kehte ho tum ki tu kya hai tumhi kaho ki ye andaaz-e-guftagu kya hai

hui muddat ki 'Ghalib' mar gaya par yaad aata hai wo har ik baat par kehna ki yun hota to kya hota

ye masail-e-tasawwuf, ye tera bayaan 'Ghalib' tujhe hum wali samajhte jo na baada-khwaar hota

nikalna khuld se aadam ka sunte aaye hain lekin bahut be-aabru ho kar tere kooche se hum nikle

aah ko chahiye ik umr asar hone tak kaun jeeta hai teri zulf ke sar hone tak

hum ne maana ki taghaful na karoge lekin khaak ho jayenge hum tum ko khabar hone tak

ishq par zor nahin, hai ye wo aatish 'Ghalib' ki lagaye na lage aur bujhaye na bane

un ke dekhe se jo aa jaati hai munh par raunaq wo samajhte hain ki beemar ka haal achha hai

dil hi to hai na sang-o-khisht, dard se bhar na aaye kyun roenge hum hazaar baar, koi hamein sataye kyun

hain aur bhi duniya mein sukhanvar bahut achhe kehte hain ki 'Ghalib' ka hai andaaz-e-bayaan aur

maut ka ek din muayyan hai neend kyun raat bhar nahin aati

koi ummeed bar nahin aati koi soorat nazar nahin aati

ragon mein daudte phirne ke hum nahin qayal jab aankh se hi na tapka to phir lahu kya hai

bazicha-e-atfal hai duniya mere aage hota hai shab-o-roz tamasha mere aage

ishq ne 'Ghalib' nikamma kar diya warna hum bhi aadmi the kaam ke

ye na thi hamari qismat ki visal-e-yaar hota agar aur jeete rehte yahi intezaar hota

hum ko maloom hai jannat ki haqeeqat lekin dil ke khush rakhne ko 'Ghalib' ye khayal achha hai

dil-e-nadan tujhe hua kya hai aakhir is dard ki dawa kya hai

hazaron khwahishen aisi ki har khwahish pe dam nikle bahut nikle mere armaan lekin phir bhi kam nikle