be-ḳhayālī kī ridā duur talak taanī hai — Shayari Of Abbas Qamar

"saudā barā.e zindagī āsān kar diyā jo bik nahīñ rahā thā use daan kar diyā puurī ġhazal kā lutf uThā hī nahīñ sake matle' ne is qadar hameñ hairān kar diyā mahfil meñ koī husn kā misra' agar milā itne sunā.e she'r ki dīvān kar diyā paanī pahan ke dauḌ lagā dī galī galī dariyā ne khel khel meñ nuqsān kar diyā ham toḌne ga.e the nasīhat kī boTiyāñ order janāb-e-shaiḳh ne jalpān kar diyā mushkil meñ paḌ ga.e tire chakkar meñ ḳhud magar ḳhush haiñ ki rāsta tirā āsān kar diyā sachchā.iyoñ ne ḳhvāb ke sab ḳheme Dhā diye aur 'āshiqoñ ko be-sar-o-sāmān kar diyā"

"jahāñ saare havā banñe kī koshish kar rahe the vahāñ bhī ham diyā banñe kī koshish kar rahe the hameñ zor-e-tasavvur bhī gañvānā paḌ gayā ham tasavvur meñ ḳhudā banñe kī koshish kar rahe the zamīñ par aa gire jab āsmāñ se ḳhvāb mere zamīñ ne pūchhā kyā banñe kī koshish kar rahe the unheñ āñkhoñ ne bedardī se be-ghar kar diyā hai ye aañsū qahqaha banñe kī koshish kar rahe the hameñ dushvāriyoñ meñ muskurāne kī talab thī ham ik tasvīr sā banñe kī koshish kar rahe the"

"lamha-dar-lamha tirī raah takā kartī hai ek khiḌkī tirī aamad kī duā kartī hai silvaTeñ chīḳhtī rahtī haiñ mire bistar kī karvaToñ meñ hī mirī raat kaTā kartī hai vaqt tham jaatā hai ab raat guzartī hī nahīñ jaane dīvār-ghaḌī raat meñ kyā kartī hai chāñd khiḌkī meñ jo aatā thā nahīñ aatā ab tīrgī chāroñ taraf raqs kiyā kartī hai mere kamre meñ udāsī hai qayāmat kī magar ek tasvīr purānī sī hañsā kartī hai"

"is musībat se nikalne kā vasīla kar de kho gayā hai jo mirā mujh ko vahī lā kar de ab maiñ kaise tujhe samjhā.ūñ ki uljhan kyā hai khol de saañs kī girheñ mujhe Dhīlā kar de kyā pata kaun sā rang oḌh ke aa jaa.e bahār aur tirā haath mire sāmne piilā kar de ek chuTkī ki tirī naaf meñ paḌ jaa.eñ bhañvar ek bosa ki tire gaal ko giilā kar de ruuh kī aañch baḌhā tez kar ehsās kī lau jism ko 'ishq-o-mohabbat kā patīlā kar de isti'āra koī mil jaa.e mujhe Thos aisā jo tire husn kā mazmūn lachīlā kar de"

"sāmne vaale ko halkā jaan kar bhārī haiñ aap aap kā me'yār dekhā kitne me'yārī haiñ aap saare dariyā sab samundar muntazir haiñ aap ke jā.iye bahiye mirī āñkhoñ se kyoñ jaarī haiñ aap uf talak karte nahīñ zill-e-ilāhī ke ḳhilāf aap ko darbār kī 'ādat hai darbārī haiñ aap aap kī āzādiyāñ haiñ aap hī ke haath meñ jis pe qudrat bhī hai nāzāñ vo giraftārī haiñ aap jism ke piñjre meñ le kar ghūmiye nannhī sī jaan chand sāñsoñ kī mire pyāre adākārī haiñ aap"

"hālat-e-hāl se begāna banā rakkhā hai ḳhud ko maazī kā nihāñ-ḳhāna banā rakkhā hai ḳhauf-e-dozaḳh ne hī ījād kiyā hai sajda Dar ne insān ko dīvāna banā rakkhā hai mimbar-e-ishq se taqrīr kī ḳhvāhish hai hameñ dil ko is vāste maulānā banā rakkhā hai mātam-e-shauq bapā karte haiñ har shaam yahāñ jism ko ham ne azāñ-ḳhāna banā rakkhā hai vaqt-e-ruḳhsat hai mire chāhne vāloñ ne bhī ab saañs ko vaqt kā paimāna banā rakkhā hai jānte haiñ vo parinda hai nahīñ Thahregā ham ne us dil ko magar daanā banā rakkhā hai"