sāmne vaale ko halkā jaan kar bhārī haiñ aap — Shayari Of Abbas Qamar

"saudā barā.e zindagī āsān kar diyā jo bik nahīñ rahā thā use daan kar diyā puurī ġhazal kā lutf uThā hī nahīñ sake matle' ne is qadar hameñ hairān kar diyā mahfil meñ koī husn kā misra' agar milā itne sunā.e she'r ki dīvān kar diyā paanī pahan ke dauḌ lagā dī galī galī dariyā ne khel khel meñ nuqsān kar diyā ham toḌne ga.e the nasīhat kī boTiyāñ order janāb-e-shaiḳh ne jalpān kar diyā mushkil meñ paḌ ga.e tire chakkar meñ ḳhud magar ḳhush haiñ ki rāsta tirā āsān kar diyā sachchā.iyoñ ne ḳhvāb ke sab ḳheme Dhā diye aur 'āshiqoñ ko be-sar-o-sāmān kar diyā"

"be-ḳhayālī kī ridā duur talak taanī hai ab to ye bhī nahīñ lagtā ki pareshānī hai sard mausam meñ bhaḌak uTThī hai tanhā.ī kī aag jo baḌhā detī hai mushkil vahī āsānī hai āb-e-girya se hai dīdār kī sūrat paidā dekhiye ġhaur se aañkh aañkh nahīñ paanī hai maiñ to ehsās kī tasvīr banā baiThā huuñ raunaq-e-bazm-e-tasavvur mirī hairānī hai ye jo duniyā hai ye duniyā kī banā.ī huī hai aadmī kyā hai nazariyāt kī shaitānī hai ye ġhazal sun ke kaheñge ‘qamar-abbās-qamar' yaar 'abbās-qamar' tum ne 'ajab Thānī hai"

"is musībat se nikalne kā vasīla kar de kho gayā hai jo mirā mujh ko vahī lā kar de ab maiñ kaise tujhe samjhā.ūñ ki uljhan kyā hai khol de saañs kī girheñ mujhe Dhīlā kar de kyā pata kaun sā rang oḌh ke aa jaa.e bahār aur tirā haath mire sāmne piilā kar de ek chuTkī ki tirī naaf meñ paḌ jaa.eñ bhañvar ek bosa ki tire gaal ko giilā kar de ruuh kī aañch baḌhā tez kar ehsās kī lau jism ko 'ishq-o-mohabbat kā patīlā kar de isti'āra koī mil jaa.e mujhe Thos aisā jo tire husn kā mazmūn lachīlā kar de"

"ashkoñ ko ārzū-e-rihā.ī hai roiye āñkhoñ kī ab isī meñ bhalā.ī hai roiye ronā ilāj-e-zulmat-e-duniyā nahīñ to kyā kam-az-kam ehtijāj-e-ḳhudā.ī hai roiye taslīm kar liyā hai jo ḳhud ko charāġh-e-haq duniyā qadam qadam pe sabā.ī hai roiye ḳhush haiñ to phir musāfir-e-duniyā nahīñ haiñ aap is dasht meñ bas ābla-pā.ī hai roiye ham haiñ asīr-e-zabt ijāzat nahīñ hameñ ro pā rahe haiñ aap badhā.ī hai roiye"

"hālat-e-hāl se begāna banā rakkhā hai ḳhud ko maazī kā nihāñ-ḳhāna banā rakkhā hai ḳhauf-e-dozaḳh ne hī ījād kiyā hai sajda Dar ne insān ko dīvāna banā rakkhā hai mimbar-e-ishq se taqrīr kī ḳhvāhish hai hameñ dil ko is vāste maulānā banā rakkhā hai mātam-e-shauq bapā karte haiñ har shaam yahāñ jism ko ham ne azāñ-ḳhāna banā rakkhā hai vaqt-e-ruḳhsat hai mire chāhne vāloñ ne bhī ab saañs ko vaqt kā paimāna banā rakkhā hai jānte haiñ vo parinda hai nahīñ Thahregā ham ne us dil ko magar daanā banā rakkhā hai"

"ham aise sar-phire duniyā ko kab darkār hote haiñ agar hote bhī haiñ be-intihā dushvār hote haiñ ḳhamoshī kah rahī hai ab ye do-ābā ravāñ hogā havā chup ho to bārish ke shadīd āsār hote haiñ zarā sī baat hai is kā tamāshā kyā banā.eñ ham irāde TūTte haiñ hausle mismār hote haiñ shikāyat zindagī se kyuuñ kareñ ham ḳhud hī tham jaa.eñ jo kam-raftār hote haiñ vo kam-raftār hote haiñ gale meñ zindagī ke rīsmān-e-vaqt hai to kyā parinde qaid meñ hoñ to bahut hushyār hote haiñ jahāñ vaale muqayyad haiñ abhī tak ahd-e-tiflī meñ yahāñ ab bhī khilaune raunaq-e-bāzār hote haiñ gulū-e-ḳhushk un ko bhejtā hai de ke mashkīza kuchh aañsū tishna-kāmoñ ke alam-bardār hote haiñ badan un ko kabhī bāhar nikalne hī nahīñ detā 'qamar-abbas' to bā-qā.edā tayyār hote haiñ"