"tirī barbādiyoñ kā zikr bazm-e-dil-brāñ tak hai kahāñ kī baat hai ai dil magar pahuñchī kahāñ tak hai tū kyā jaane mohabbat ke maze ai nāseh-e-nādāñ pahuñch tirī nigāhoñ kī faqat sūd-o-ziyāñ tak hai ham insāñ haiñ magar taḳhlīq-e-a.alā haiñ ki ai hamdam hamāre auj kā charchā zamīñ se āsmāñ tak hai mohabbat āzmātī hai mohabbat karne vāloñ ko ye saḳhtī ai dil-e-betāb tujh par imtihāñ tak hai jahāñ meñ vaise to jiite haiñ sab lekin jo sach pūchho maza jiine kā duniyā meñ bahār-e-dostāñ tak hai koī jab dost kahtā hai to sun letā huuñ ai 'āsī' ki ab to dostī is ahd meñ husn-e-bayāñ tak hai"
"har shāḳh-e-gul ko be-sar-o-sāmāñ banā diyā yāroñ ne gulsitāñ ko bayābāñ banā diyā taḳhlīq sab kī ek hai a.amāl ne magar kāfir tujhe to mujh ko musalmāñ banā diyā is jān-e-gulsitāñ kī tamannā ne ai nadīm mujh ko har ik chaman se gurezāñ banā diyā dushvār ho chukī thī mujhe zindagī magar sāqī-e-dil-navāz ne āsāñ banā diyā 'āsī' ḳhudā kā shukr karo jis ke lutf ne auroñ ke saath tum ko bhī insāñ banā diyā"
All Writings Of Aasi Aarwi"vaise is āb-o-gil meñ kyā na huā koī banda magar ḳhudā na huā uf re un ke jamāl kā aalam mujh se iz.hār-e-mudda.ā na huā sāqī-e-mai-kadā ne jo de dī maiñ use pī ke bad-maza na huā mujh se ibrat jahāñ ko hāsil hai maiñ burā ho ki bhī burā na huā zaḳhm dil kā shumār kaun kare tiir us kā koī ḳhatā na huā qaid-e-ġham se magar rihā nā huā maiñ ne koshish bhī kī duā bhī kī qaid-e-ġham se magar rihā na huā mar gayā 'āsī'-e-shikasta-dil ye bhī achchhā huā burā na huā"
All Writings Of Aasi Aarwi"rūdād-e-ġham meñ DhūñDiye lutf-e-bayāñ nahīñ ye to hadīs-e-dil hai koī dāstāñ nahīñ shikva nahīñ gila nahīñ āh-o-fuġhāñ nahīñ apnā jo haal hai vo kisī par ayaañ nahīñ apnā yaqīñ kabhī bhī asīr-e-gumāñ nahīñ ai shaiḳh un ke mere koī darmiyāñ nahīñ ai dil jafā-e-ahl-e-jahāñ se na ho malūl in kī razā jo ho to musībat garāñ nahīñ kyā DhūñDhtā hai is meñ ġham-o-rañj ke sivā ye merī dāstāñ hai tirī dāstāñ nahīñ ishq-e-sitam samajh ke zarā ai nigāh-e-dost ye terā imtihāñ hai mirā imtihāñ nahīñ hairān huuñ vahāñ maiñ kahūñ kyā zabān se 'āsī' nigāh dil kī jahāñ tarjumāñ nahīñ"
All Writings Of Aasi Aarwi"na qahqaha na tabassum na ashk paiham hai jahāñ pe ham haiñ vahāñ kuchh ajiib aalam hai jo pahle aaj se thā aaj bhī vahī ġham hai ye daur-e-jām nahīñ hai fareb-e-paiham hai burā na maano to ik baat tum se arz karūñ tumhārā lutf ba-andāza-e-sitam kam hai ye sub.h-o-shām kī mastī ye nashsha-e-shab-o-roz tire baġhair koī kaif ho mujhe sam hai sar-e-niyāz kabhī us ke sāmne na jhukā isī qusūr pe ham se zamāna barham hai hai baat baat pe hajv-e-subū-o-sāġhar-o-mai janāb-e-hazrat-e-vā.is se naak meñ dam hai nigāh-e-nāz ko taklīf-e-iltifāt na do ki ab to zaḳhm-e-jigar be-niyāz-e-marham hai ḳhatā zarūr koī us se bhī huī hogī ki āḳhir 'āsī'-e-ḳhasta bhī ibn-e-ādam hai"
All Writings Of Aasi Aarwi"ḳhirad vaalā bhī apne aap se begāna aatā hai jo un kī bazm se aatā hai vo dīvāna aatā hai na josh-e-mai na kaif-e-naġhma-e-rindāna aatā hai ik aisā vaqt bhī ai sāqi-e-mai-ḳhāna aatā hai bayān-e-dard dil ko vā.iz-e-farzāna aatā hai vo kyā jaane haqīqat us ko to afsāna aatā hai maiñ chaltā to huuñ ghar se jānib-e-masjid magar nāseh qadam ruk jaate haiñ raste meñ jab mai-ḳhāna aatā hai ḳhirad vāloñ se jab hal mas.aloñ ke ho nahīñ paate to phir is kaam kī ḳhātir koī dīvāna aatā hai bahut mushkil hai in se bach ke rūdād-e-alam kahnā ki afsāne se pahle sāhab-e-afsāna aatā hai na jaane kaun sī lazzat hai is sozish meñ ai 'āsī' ki pesh-e-sham.a jalne ke liye parvāna aatā hai"
All Writings Of Aasi Aarwi"shikasta sāz-e-mohabbat kī ik sadā huuñ maiñ jo rah ga.ī hai laraz kar vo iltijā huuñ maiñ dam-e-nazāra ye dīvāngī-e-zauq-e-nigāh vo mujh ko DhūñDte haiñ un ko DhūñDhtā huuñ maiñ jahāñ ye kufr hai taqdīr kā gila karnā ab is maqām pe apne ko pā rahā huuñ maiñ salām ai nigah-e-be-niyāz-e-garmi-e-ishq ḳhatā muaaf ki ab sard ho rahā huuñ maiñ mirā hī zarf hai is mai-kada meñ ai saaqī ki jām-e-talḳh bhī hañs hañs ke pī rahā huuñ maiñ mirī talāsh meñ rahtī hai ḳhud mirī manzil ġhalat ḳhayāl ki manzil ko DhūñDhtā huuñ maiñ vahīñ se paa.ī hai manzil kī raah ai 'āsī' jahāñ pe us kī mohabbat meñ kho gayā huuñ maiñ"
All Writings Of Aasi Aarwi