shaayad zabaan pe qarz thaa ham ne chukaa diyaa — Ajay Sahaab

ek muddat se dhadhaktaa rahaa meraa ye zehn
tab kahin jaa ke farozaan hue lafzon ke charaagh

— Ajay Sahaab

aise sulag uThaa tiri yaadon se dil miraa
jaise dhadhak uThein kahin jangal chinaar ke

— Ajay Sahaab

fan jo meaar tak nahin pahunchaa
apne shahkaar tak nahin pahunchaa

— Ajay Sahaab

kaash lauTein mire paapaa bhi khilaune le kar
kaash phir se mire haathon mein khazaana aae

— Ajay Sahaab

haadse jaan to lete hain magar sach ye hai
haadse hi hamein jiinaa bhi sikhaa dete hain

— Ajay Sahaab

jab bhi milte hain to jiine ki duaa dete hain
jaane kis baat ki vo ham ko sazaa dete hain

— Ajay Sahaab

main baDaa ho gayaa huun magar bachpanaa
mere dil se kabhi bhi gayaa hi nahin

— Divyansh Rawat

raat yuun dil mein tiri khoi hui yaad aai
jaise viraane mein chupke se bahaar aa jaae

— Faiz Ahmad Faiz

gulon ne kaanTon ke chheDne par sivaa khamoshi ke dam na maaraa
sharif uljheinge gar kisi se to phir sharaafat kahaan rahegi

— Unknown

rone se 'khaaksaar' ki sotaa nahin hai koi
us khaanumaan-kharaab ko chupkaa khudaa kare

— Unknown

meraa maqsad ki vo khush hon miri khaamoshi se
un ko andesha ki ye bhi koi fariyaad na ho

— Wahshat Raza Ali Kalkatvi

is zamaane mein khamoshi se nikaltaa nahin kaam
naala pur-shor ho aur zoron pe fariyaad rahe

— Wahshat Raza Ali Kalkatvi