tavaaf-e-maah karnaa aur khalaa mein saans lenaa kyaa — Anees Ahmad Anees

gavaaraa hi na thi jin ko judaai meri dam-bhar ki
unhin se aaj meri shakl pahchaani nahin jaati

— Anees Ahmad Anees

ab gham kaa koi gham na khushi ki khushi mujhe
aakhir ko raas aa hi gai zindagi mujhe

— Anees Ahmad Anees

main vo rind-e-nau nahin huun jo zaraa si pi ke bahkun
abhi aur aur saaqi ki main phir sambhal rahaa huun

— Anees Ahmad Anees

kabhi ik baar haule se pukaaraa thaa mujhe tum ne
kisi ki mujh se ab aavaaz pahchaani nahin jaati

— Anees Ahmad Anees

udhar vo ahd-o-paimaan-e-vafaa ki baat karte hain
idhar mashq-e-sitam bhi tark farmaayaa nahin jaataa

— Anees Ahmad Anees

hamin ne chun liye phulon ke badle khaar daaman mein
faqat gulchin ke sar ilzaam Thahraayaa nahin jaataa

— Anees Ahmad Anees

main baDaa ho gayaa huun magar bachpanaa
mere dil se kabhi bhi gayaa hi nahin

— Divyansh Rawat

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

— Shakeel Badayuni

us ke munh pe mukar gayaa thaa dil
aaj had se guzar gayaa thaa dil

— Divyansh Rawat

main badalte hue haalaat mein Dhal jaataa huun
dekhne vaale adaakaar samajhte hain mujhe

— Shahid Zaki

dil-e-haris hi apnaa na ho sakaa qaane
vagarna tere karam mein to kuchh kami na rahi

— Soz Hoshiarpuri