Umeed

sau sau umīdeñ bañdhtī hai ik ik nigāh par
mujh ko na aise pyaar se dekhā kare koī

dil nā-umīd to nahīñ nākām hī to hai
lambī hai ġham kī shaam magar shaam hī to hai

gar tujh ko hai yaqīn-e-ijābat duā na maañg
ya.anī baġhair-e-yak-dil-e-be-mudda.ā na maañg

rahī na tāqat-e-guftār aur agar ho bhī
to kis umiid pe kahiye ki aarzū kyā hai

yahī hai zindagī kuchh ḳhvāb chand ummīdeñ
inhīñ khilaunoñ se tum bhī bahal sako to chalo

zamāna saḳht kam-āzār hai ba-jān-e-asad
vagarna ham to tavaqqo zyāda rakhte haiñ

yaqīn chāñd pe sūraj meñ e'tibār bhī rakh
magar nigāh meñ thoḌā sā intizār bhī rakh

bāzār-e-bosa tez se hai tez-tar 'zafar'
ummīd to nahīñ ki ye mahñgā.ī ḳhatm ho

na jaane kis liye ummīd-vār baiThā huuñ
ik aisī raah pe jo terī rahguzar bhī nahīñ

bas is sabab se ki tujh par bahut bharosa thā
gile na hoñ bhī to hairāniyāñ to hotī haiñ

dil ko tirī chāhat pe bharosa bhī bahut hai
aur tujh se bichhaḌ jaane kā Dar bhī nahīñ jaatā

ek be-chehra sī ummīd hai chehra chehra
jis taraf dekhiye aane ko hai aane vaalā

umīd-e-hūr ne sab kuchh sikhā rakkhā hai vaa.iz ko
ye hazrat dekhne meñ sīdhe-sāde bhole-bhāle haiñ

koī ummīd bar nahīñ aatī
koī sūrat nazar nahīñ aatī

butoñ se tujh ko umīdeñ ḳhudā se naumīdī
mujhe batā to sahī aur kāfirī kyā hai

dar-e-umīd se ho kar nikalne lagtā huuñ
to yaas rauzan-e-zindāñ se aañkh mārtī hai

huī jin se tavaqqo ḳhastagī kī daad paane kī
vo ham se bhī ziyāda ḳhasta-e-teġh-e-sitam nikle

koshish bhī kar umiid bhī rakh rāsta bhī chun
phir is ke baa'd thoḌā muqaddar talāsh kar

ab tak dil-e-ḳhush-fahm ko tujh se haiñ umīdeñ
ye āḳhirī sham.eñ bhī bujhāne ke liye aa

sambhalne de mujhe ai nā-umīdī kyā qayāmat hai
ki dāmān-e-ḳhayāl-e-yār chhūTā jaa.e hai mujh se