jo rukaavaT thi hamaari raah ki — Azhar Abbas

apne viraane kaa nuqsaan nahin chaahtaa main
yaani ab dusraa insaan nahin chaahtaa main

— Azhar Abbas

akelaa main hi nahin jaa rahaa huun basti se
ye raushni bhi mire saath jaane vaali hai

— Azhar Abbas

hansi mazaaq ki baatein yahin pe khatm huiin
ab is ke baa'd kahaani rulaane vaali hai

— Azhar Abbas

tu kahaani ke badalte hue manzar ko samajh
khuun rote hue kirdaar ki jaanib mat dekh

— Azhar Abbas

yuun to har ek shakhs kaa apnaa hi shor hai
lekin kisi se koi yahaan boltaa nahin

— Azhar Abbas

mujhe bayaan kar rahaa thaa koi shakhs
main apni daastaan DhunDhtaa rahaa

— Azhar Abbas

ret par ik nishaan hai shaayad
ye hamaaraa makaan hai shaayad

— Muzaffar Abdali

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

— Irfan Sattar

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

— Aabid Adeeb

aasmaan jhaank rahaa hai 'khaalid'
chaand kamre mein mire utraa hai

— Khalid Sharif