koi shai dil ko bahlaati nahin hai — Bakhsh Layalpuri

hamaare khvaab chori ho gae hain
hamein raaton ko niind aati nahin hai

— Bakhsh Layalpuri

kabhi aankhon pe kabhi sar pe biThaae rakhnaa
zindagi talkh sahi dil se lagaae rakhnaa

— Bakhsh Layalpuri

dard-e-hijrat ke sataae hue logon ko kahin
saaya-e-dar bhi nazar aae to ghar lagtaa hai

— Bakhsh Layalpuri

ahl-e-zar ne dekh kar kam-zarfi-e-ahl-e-qalam
hirs-e-zar ke har taraazu mein sukhan-var rakh diye

— Bakhsh Layalpuri

vahi patthar lagaa hai mere sar par
azal se jis ko sajde kar rahaa huun

— Bakhsh Layalpuri

ghar bhi viraana lage taaza havaaon ke baghair
baad-e-khush-rang chale dasht bhi ghar lagtaa hai

— Bakhsh Layalpuri

main baDaa ho gayaa huun magar bachpanaa
mere dil se kabhi bhi gayaa hi nahin

— Divyansh Rawat

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

— Shakeel Badayuni

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

main badalte hue haalaat mein Dhal jaataa huun
dekhne vaale adaakaar samajhte hain mujhe

— Shahid Zaki

us ke munh pe mukar gayaa thaa dil
aaj had se guzar gayaa thaa dil

— Divyansh Rawat

dil-e-haris hi apnaa na ho sakaa qaane
vagarna tere karam mein to kuchh kami na rahi

— Soz Hoshiarpuri