qabr mein raahat se soe the na thaa mahshar kaa khauf — Bhartendu Harishchandra

ye chaar din ke tamaashe hain aah duniyaa ke
rahaa jahaan mein sikandar na aur na jam baaqi

— Bhartendu Harishchandra

ai 'rasaa' jaisaa hai bargashta zamaana ham se
aisaa bargashta kisi kaa na muqaddar hogaa

— Bhartendu Harishchandra

na bosa lene dete hain na lagte hain gale mere
abhi kam-umr hain har baat par mujh se jhijakte hain

— Bhartendu Harishchandra

baat karne mein jo lab us ke hue zer-o-zabar
ek saaat mein tah-o-baalaa zamaana ho gayaa

— Bhartendu Harishchandra

ye kah do bas maut se ho rukhsat kyuun naahaq aai hai us ki shaamat
ki dar talak vo masih-khaslat miri ayaadat ko aa chuke hain

— Bhartendu Harishchandra

abhi to aae ho jaldi kahaan hai jaane ki
uTho na pahlu se Thahro zaraa kidhar ko chale

— Bhartendu Harishchandra

donon ke dil mein khauf thaa maidaan-e-jang mein
donon kaa khauf faasla thaa darmiyaan kaa

— Mohammad Alvi

leaderi chaaho to lafz-e-qaum hai mehmaan-navaaz
gap-navison ko aur ahl-e-mez ko raazi karo

— Akbar Allahabadi

pi shauq se vaaiz are kyaa baat hai Dar ki
dozakh tire qabze mein hai jannat tire ghar ki

— Shakeel Badayuni

Dar hai na dupaTTa kahin siine se sarak jaae
pankhaa bhi hamein paas se jhalne nahin dete

— Riyaz Khairabadi

ji chaahtaa hai aaj 'adam' un ko chheDiye
Dar Dar ke pyaar karne mein koi mazaa nahin

— Abdul Hamid Adam

qaum ke gham mein dinner khaate hain hukkaam ke saath
ranj leader ko bahut hai magar aaraam ke saath

— Akbar Allahabadi