sunaa hai amn-paraston kaa vo ilaaqa hai — Faragh Rohvi

mujh mein hai yahi aib ki auron ki tarah main
chehre pe kabhi dusraa chehraa nahin rakhtaa

khuub nibhegi ham donon mein mere jaisaa tu bhi hai
thoDaa jhuTaa main bhi Thahraa thoDaa jhuTaa tu bhi hai

kisi ne raah kaa patthar hamin ko Thahraayaa
ye aur baat ki phir aaina hamin Thahre

ik din vo mere aib ginaane lagaa 'faraagh'
jab khud hi thak gayaa to mujhe sochnaa paDaa

tumhaaraa chehra tumhein hu-ba-hu dikhaaungaa
main aaina huun miraa e'tibaar tum bhi karo

ham se tahzib kaa daaman nahin chhoDaa jaataa
dasht-e-vahshat mein bhi aadaab liye phirte hain