ab faqiri mein koi baat nahin — Farooq Nazki

bhaTak na jaataa agar zaat ke bayaabaan mein
to meraa naqsh-e-qadam meraa raahbar hotaa

— Farooq Nazki

kaanch ke alfaaz kaaghaz par na rakh
sang-e-maani ban ke Takraaungaa main

— Farooq Nazki

hisaar-e-khauf-o-hiraas mein hai butaan-e-vahm-o-gumaan ki basti
mujhe khabar hi nahin ki ab main junub mein yaa shumaal mein huun

— Farooq Nazki

jab koi naujavaan martaa hai
aarzu kaa jahaan martaa hai

— Farooq Nazki

aap ki tasvir thi akhbaar mein
kyaa sabab hai aap ghar jaate nahin

— Farooq Nazki

mujh se kyaa puchhte ho naam pata
main to bas aap kaa hi saaya huun

— Farooq Nazki

ai amiri agar hai tujh mein dam
kisi darvesh se ulajh kar dekh

— Naeem Najmi

qaasidaa ham faqir logon kaa
ik Thikaana nahin ki tujh se kahein

— Ahmad Faraz

be-zari faaqa-kashi muflisi be-saamaani
ham faqiron ke bhi haan kuchh nahin aur sab kuchh hai

— Nazeer Akbar Abadi

ham faqiron se be-adaai kyaa
aan baiThe jo tum ne pyaar kiyaa

— Mir Taqi Mir

hain vo suufi jo kabhi naalaa-e-naaqus sunaa
vajd karne lage ham dil kaa ajab haal huaa

— Wazir Ali Saba Lakhnavi

aur agar chaahe ki ho 'khvaah-makhvaah' shohrat teri
yusufi gar nahin mumkin to zulekhaai kar

— Ghaus Khah Makhah Hyderabadi