kyaa kahaani ko isi moD pa ruknaa hogaa — Javed Nasir

aahaT bhi agar ki to tah-e-zaat nahin ki
lafzon ne kai din se koi baat nahin ki

— Javed Nasir

khulti hain aasmaan mein samundar ki khiDkiyaan
be-din raaston pe kahin apnaa ghar to hai

— Javed Nasir

bahut udaas thaa us din magar huaa kyaa thaa
har ek baat bhali thi to phir buraa kyaa thaa

— Javed Nasir

dasht ki dhuup hai jangal ki ghani raatein hain
is kahaani mein bahr haal kai baatein hain

— Javed Nasir

dosto tum se guzaarish hai yahaan mat aao
is baDe shahr mein tanhaai bhi mar jaati hai

— Javed Nasir

raat aa jaae to phir tujh ko pukaarun yaa-rab
meri aavaaz ujaale mein bikhar jaati hai

— Javed Nasir

pyaaso raho na dasht mein baarish ke muntazir
maaro zamin pe paanv ki paani nikal paDe

— Iqbal Sajid

sabza o gul kahaan se aae hain
abr kyaa chiiz hai havaa kyaa hai

— Mirza Ghalib

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai

— Zafar Iqbal

chaand ne taan li hai chaadar-e-abr
ab vo kapDe badal rahi hogi

— Jaun Elia

sach ishq mein hain aashiq o maashuq baraabar
jo mushkil-e-majnun hai so hai mushkil-e-lailaa

— Mushafi Ghulam Hamdani

duur tak chhaae the baadal aur kahin saaya na thaa
is tarah barsaat kaa mausam kabhi aayaa na thaa

— Qateel Shifai